Ram Mandir Funds Theft: رام مندر چندہ چوری ،مودی جی اور ان کے ساتھیوں کا صرف ایک ہی خواب ہےرام نام جپنا، پرایا مال اپنا- جے رام رمیش

نئی دہلی: ایودھیا کے رام مندر میں چندے کی مبینہ چوری کے معاملے پر کانگریس نے ایک بار پھر مرکزی حکومت کو شدید تنقید کا نشانہ بنایا ہے۔ کانگریس کے سینئر لیڈراور راجیہ سبھا رکن جے رام رمیش نے وزیر اعظم نریندر مودی اور بھارتیہ جنتا پارٹی (بی جے پی) پر سخت الفاظ میں حملہ کرتے ہوئے الزام لگایا کہ اس معاملے کے اصل ملزمان کو سیاسی سرپرستی حاصل ہے اور انہیں بچانے کی کوشش کی جا رہی ہے۔یہ بیان ایسے وقت میں سامنے آیا ہے، جب ایودھیا میں رام مندر کے درشن کے لیے جانے والے اتر پردیش کانگریس کے صدر اجے رائے کو مبینہ طور پر ایک ہوٹل میں روک دیا گیا۔ کانگریس کا دعویٰ ہے کہ اجے رائے کو ہوٹل پدم شری پیلس میں “ہاؤس اریسٹ” کر دیا گیا، حالانکہ وہ نو رکنی وفد کے ساتھ ایک روز قبل ہی ایودھیا پہنچے تھے۔

منگل کو سوشل میڈیا پلیٹ فارم ایکس پر جاری اپنے بیان میں جے رام رمیش نے لکھا، “مودی جی اور ان کے ساتھیوں کا صرف ایک ہی خواب ہے، رام نام جپنا، پرایا مال اپنا۔” انہوں نے الزام لگایا کہ رام مندر میں چندے کی مبینہ چوری سے پورا ملک دکھی ہے اور عوام کے دباؤ کے بعد ایس آئی ٹی کی رپورٹ کی بنیاد پر ایف آئی آر تو درج کر لی گئی، لیکن اتنا وقت گزرنے کے باوجود مرکزی ملزمان آزاد گھوم رہے ہیں ،کیونکہ ان کا تعلق آر ایس ایس اور بی جے پی سے بتایا جا رہا ہے۔

मोदी जी और उनके साथियों का बस यही सपना,
राम नाम जपना, पराया माल अपना।

श्रीराम मंदिर में हुई चंदा लूट से पूरा देश व्यथित है।

देशवासियों के दबाव के चलते एसआईटी की रिपोर्ट के बाद FIR हुई, लेकिन इतने दिन बाद भी RSS- BJP से जुड़े होने के कारण मुख्य आरोपी खुलेआम घूम रहे हैं।

इस बीच… pic.twitter.com/OjC5xoKL33

— Jairam Ramesh (@Jairam_Ramesh) June 30, 2026

جے رام رمیش نے مزید کہا کہ کانگریس لیڈروں  کو رام مندر جانے سے روکنا اور انہیں مبینہ طور پر نظر بند کرنا انتہائی قابلِ مذمت ہے۔ ان کے مطابق حکومت آمریت کا مظاہرہ کرتے ہوئے اپوزیشن کی آواز دبانے کی کوشش کر رہی ہے۔کانگریس کے جنرل سکریٹری نے الزام لگایا کہ ملک کے عوام اس معاملے میں فوری اور سخت کارروائی چاہتے ہیں، لیکن وزیر اعظم نریندر مودی، اتر پردیش کے وزیر اعلیٰ یوگی آدتیہ ناتھ اور بی جے پی۔آر ایس ایس کا پورا نظام اس چندہ چوری کیس کے ملزمان کو بچانے اور معاملے کو دبانے میں مصروف ہے۔

وزیر اعظم مودی کو مخاطب کرتے ہوئے جے رام رمیش نے کہا، “وزیر اعظم جی، رام مندر میں ہونے والی اس مبینہ لوٹ کے ذمہ داروں کو بچانے والے بھی برابر کے قصوروار ہیں۔ اس گھناؤنے عمل پر بھگوان شری رام آپ کو ضرور سزا دیں گے اور ملک کی عوام بھی مناسب وقت پر اپنا فیصلہ سنائے گی۔”واضح رہے کہ یہ تمام الزامات کانگریس کی جانب سے لگائے گئے ہیں۔ اس معاملے پر حکومت یا بی جے پی کی جانب سے اس بیان کے حوالے سے فوری طور پر کوئی ردعمل سامنے نہیں آیا ہے، جبکہ چندہ چوری کے معاملے کی تحقیقات متعلقہ اداروں کی جانب سے جاری ہیں۔

بھارت ایکسپریس اردو