بھارت کا پہلا نجی راکٹ 15 نومبر کو لانچ

نئی دہلی، 12 نومبر (بھارت ایکسپریس): ہندوستان کے نجی شعبے کے ذریعہ تیار کردہ پہلا راکٹ ‘وکرم-ایس’ 15 نومبر کو لانچ کیا جائے گا۔  حیدرآباد میں قائم خلائی اسٹارٹ اپ ‘اسکائی روٹ ایرو اسپیس’ نے جمعہ کو یہ اعلان کیا۔  اسکائی روٹ ایرو اسپیس کے اس اولین مشن کو ‘پرارمبھ’ کا نام دیا گیا ہے جو تین صارفین کے پے لوڈ لے کر جائے گا اور اسے شری ہری کوٹا میں انڈین اسپیس ریسرچ آرگنائزیشن (ISRO) کے لانچ پیڈ سے لانچ کیا جائے گا۔

کمپنی نے جمعہ کو کہا کہ، ’’دل کی دھڑکن بڑھ گئی ہے۔  سب کی نظریں آسمان کی طرف ہیں۔  زمین سن رہی ہے۔  یہ 15 نومبر 2022 کو لانچ ہونے کا اشارہ ہے۔ اسکائی روٹ ایرو اسپیس کے چیف ایگزیکٹو آفیسر (سی ای او) اور شریک بانی پون کمار چاندنا نے ‘پی ٹی آئی-بھاشا’ کو بتایا کہ لانچ صبح 11.30 بجے کیا جائے گا۔