Indian Railway – Ticket price hike: ہو جائیں ہوشیار! کل سےتبدیل ہو رہے ہیں ٹرین ٹکٹوں کے دام، سفر پر نکلنے سے پہلے ضرور پڑھ لیں یہ قواعد

بھارتی ریلوے نے اپنے کرایہ جاتی ڈھانچے (Fare Structure) میں کچھ تبدیلیاں کی ہیں، جو کل یعنی 26 دسمبر 2025 سے نافذ ہونے جا رہی ہیں۔ ریلوے کا کہنا ہے کہ یہ قدم آپریشنل اخراجات اور مسافروں کی سہولت کے درمیان توازن قائم رکھنے کے لیے اٹھایا گیا ہے۔ اچھی بات یہ ہے کہ کم فاصلے کا سفر کرنے والے مسافر اور روزانہ دفتر آنے جانے والے سیزن ٹکٹ (Season Ticket) ہولڈرز کو ان تبدیلیوں سے مستثنیٰ رکھا گیا ہے۔

عام آدمی کو راحت

سب سے بڑی راحت کی بات یہ ہے کہ مضافاتی خدمات یعنی لوکل ٹرینوں اور سیزن ٹکٹوں کے کرایوں میں کوئی تبدیلی نہیں کی گئی ہے۔ اس کا مطلب یہ ہے کہ شہر کے اندر یا آس پاس روزانہ سفر کرنے والے لاکھوں مسافروں کو ایک روپیہ بھی اضافی ادا نہیں کرنا ہوگا۔

کم فاصلے پر کوئی اثر نہیں

اگر آپ جنرل کلاس میں سفر کرتے ہیں تو ریلوے نے یہاں ’’کلومیٹر فارمولہ‘‘ لاگو کیا ہے:215 کلومیٹر تک: اگر آپ کا سفر 215 کلومیٹر کے دائرے میں ہے تو پرانا کرایہ ہی لاگو ہوگا۔ یعنی نزدیکی شہروں کے درمیان سفر کرنے والوں پر کوئی اضافی بوجھ نہیں پڑے گا۔

طویل فاصلے: 216 سے 750 کلومیٹر تک کے سفر پر صرف 5 روپے اضافہ، 751 سے 1250 کلومیٹر تک 10 روپے اور 1251 سے 1750 کلومیٹر تک 15 روپے کا اضافہ کیا گیا ہے۔ اس سے زیادہ فاصلے کے لیے زیادہ سے زیادہ 20 روپے کا اضافہ کیا گیا ہے۔

میل، ایکسپریس اور پریمیئم ٹرینیں

اگر آپ میل، ایکسپریس یا پریمیئم ٹرینوں (جیسے وندے بھارت، راجدھانی، شتابدی) میں سفر کرتے ہیں تو اب فی کلومیٹر 2 پیسے زیادہ ادا کرنے ہوں گے۔ یہ اصول اے سی اور نان اے سی دونوں زمروں پر لاگو ہوگا۔مثال کے طور پر اگر آپ دہلی سے لکھنؤ یا دہلی سے کانپور (تقریباً 500 کلومیٹر) ایکسپریس ٹرین کے سلیپر کوچ میں سفر کرتے ہیں تو آپ کو 10 روپے اضافی ادا کرنے ہوں گے۔ اسی تناسب سے وندے بھارت اور راجدھانی جیسی لگژری ٹرینوں کا بنیادی کرایہ (Base Fare) بھی بڑھے گا۔

پہلے سے بُک ٹکٹوں کا کیا ہوگا؟

اگر آپ نے اپنا ٹکٹ آج یا اس سے پہلے بُک کرا لیا ہے تو پریشان ہونے کی کوئی ضرورت نہیں۔ نیا کرایہ صرف ان ٹکٹوں پر لاگو ہوگا جو 26 دسمبر 2025 کو یا اس کے بعد بُک کیے جائیں گے۔ اگر آپ کا سفر کل ہے لیکن ٹکٹ پہلے سے خریدا گیا ہے تو آپ سے کوئی اضافی رقم وصول نہیں کی جائے گی۔

کل سے ریلوے اسٹیشنوں پر نئی کرایہ فہرست بھی آویزاں کر دی جائے گی تاکہ مسافروں کو کسی قسم کی الجھن نہ ہو۔

بھارت ایکسپریس اردو۔