ابوظہبی: وزیر اعظم نریندر مودی نے جمعہ کے روز کہا کہ بھارت اور یو اے ای کی دوستی نہایت مضبوط ہے اور دونوں ممالک دنیا کے بہتر مستقبل کی تعمیر کے لیے مل کر کام کرتے رہیں گے۔ ابوظہبی میں یو اے ای کے صدر شیخ محمد بن زايد آل نهيان کے ساتھ جامع اور مثبت بات چیت کے بعد وزیر اعظم مودی نے کہا، ’’بھارت اور یو اے ای کی دوستی کافی مضبوط ہے۔ ہمارے ممالک بہتر مستقبل کی تعمیر کے مقصد کے تحت ایک ساتھ آگے بڑھتے رہیں گے۔”
یو اے ای پر حملوں کی مذمت
وزیر اعظم مودی نے سوشل میڈیا پلیٹ فارم ایکس پر اپنے پیغام میں کہا کہ ان کی اپنے ’بھائی‘ شیخ محمد بن زايد آل نهيان کے ساتھ نہایت مفید گفتگو ہوئی۔ انہوں نے یو اے ای پر ہونے والے حملوں کی سخت الفاظ میں مذمت کی اور اس مشکل وقت میں شیخ محمد بن زاید کی قیادت، حوصلے اور دوراندیشی کی تعریف کی۔ انہوں نے کہا کہ یو اے ای میں مقیم بھارتی برادری کے تئیں دکھائی گئی فکر مندی اور تعاون کے لیے وہ یو اے ای قیادت کے شکر گزار ہیں۔
تجارت، توانائی اور دفاعی تعاون پر بات
وزیر اعظم مودی نے بتایا کہ دونوں لیڈران نے بھارت-یو اے ای جامع اسٹریٹجک شراکت داری کو مزید مضبوط بنانے کے طریقوں پر تبادلۂ خیال کیا۔ اس دوران تجارت، توانائی، سرمایہ کاری، دفاع، فِن ٹیک، ٹیکنالوجی، بلیو اکانومی اور عوامی روابط سمیت کئی شعبوں میں تعاون بڑھانے پر بات ہوئی۔ بھارتی وزارت خارجہ کے مطابق، مغربی ایشیا کی صورتحال اور دیگر عالمی امور پر بھی دونوں لیڈران کے درمیان تفصیلی گفتگو ہوئی۔
امن و استحکام کے عزم کا اعادہ
وزارت خارجہ نے بتایا کہ وزیر اعظم مودی نے حالیہ حملوں اور یو اے ای کی خودمختاری و علاقائی سالمیت کو نقصان پہنچانے کی کوششوں کی شدید مذمت کی۔ دونوں ممالک نے خطے میں امن، استحکام اور خوشحالی کے لیے اپنے مشترکہ عزم کا اعادہ بھی کیا۔ اس دورے کے دوران توانائی، دفاع، شپنگ، بنیادی ڈھانچے اور جدید ٹیکنالوجی کے شعبوں میں کئی اہم معاہدوں پر دستخط اور تبادلہ ہوا، جس سے بھارت اور یو اے ای کے درمیان اسٹریٹجک شراکت داری کو نئی رفتار ملنے کی امید ظاہر کی جا رہی ہے۔
وزارت خارجہ کے مطابق، یو اے ای نے بھارت میں 5 ارب ڈالر کی سرمایہ کاری کا بھی اعلان کیا ہے، جس سے دونوں ممالک کی معیشت اور بنیادی ڈھانچے کو مضبوطی ملے گی، جبکہ بھارت کی توانائی سلامتی کو بھی بڑا فائدہ پہنچے گا۔
آبنائے ہرمز کی سلامتی پر زور
وزیر اعظم مودی نے کہا کہ مغربی ایشیا میں جنگ جیسے حالات کا اثر پوری دنیا پر پڑ رہا ہے اور بھارت ہمیشہ مذاکرات اور سفارت کاری کے ذریعے مسائل کے حل کا حامی رہا ہے۔ انہوں نے کہا کہ آبنائے ہرمز کو کھلا، محفوظ اور آزاد رکھنا بھارت کی اولین ترجیح ہے اور اس مقصد کے لیے بین الاقوامی قوانین پر عمل ضروری ہے۔
یو اے ای کے ساتھ کھڑے رہیں گے
وزیر اعظم مودی نے کہا، ’’بھارت ہر صورتحال میں یو اے ای کے ساتھ شانہ بشانہ کھڑا ہے اور مستقبل میں بھی رہے گا۔ خطے میں امن اور استحکام کی بحالی کے لیے بھارت ہر ممکن تعاون فراہم کرنے کو تیار ہے۔”
بھارت ایکسپریس۔
دہلی کے شالی مار باغ میں مسجد اور اس کے آس پاس کی مبینہ غیر…
قومی آیوروید دن کے موقع پر مرکزی وزیر داخلہ و تعاون امت شاہ نے ملک…
مرکزی حکومت کی اہم اور دنیا کی سب سے بڑی صحت بیمہ اسکیم ’آیوشمان بھارت‘…
وزیراعظم مودی نے اپنے پیغام میں قومی شاعر کی عظیم شخصیت کو یاد کرتے ہوئے…
جسٹس دتا نے کہا کہ اگرچہ دونوں ججوں کا نتیجہ مختلف ہے، لیکن ان کا…
سگریٹ کی قیمتوں میں اضافے کی ایک بڑی وجہ رواں سال نافذ کیا گیا نیا…