India-Nepal Home Secretary talks: نئی دہلی میں ہندوستان اور نیپال کے درمیان ہوم سکریٹری سطح کے مذاکرات، سرحد اور سیکورٹی پر تعاون بڑھانے پر اتفاق

ایک اہم پیش رفت میں ہوم سکریٹری سطح کی بات چیت میں ہندوستان اور نیپال نے دو طرفہ سیکورٹی تعاون اور سرحدی انتظام کے طریقہ کار کا جائزہ لینے اور اسے بڑھانے پر اتفاق کیا ہے۔ یہ فیصلہ 22 جولائی کو قومی دارالحکومت دہلی میں منعقدہ ایک میٹنگ میں لیا گیا۔ ہندوستانی وفد کی قیادت ہندوستان کے ہوم سکریٹری گووند موہن نے کی جب کہ نیپالی وفد کی قیادت نیپال کے ہوم سکریٹری گوکرنا منی دوادی نے کی۔ وزارت داخلہ کی جانب سے جاری بیان میں کہا گیا ہے کہ اس بات چیت کے دوران دونوں فریقوں نے دوطرفہ سیکورٹی تعاون کے ساتھ ساتھ سرحدی انتظام کے تمام پہلوؤں کا جائزہ لیا اور اسے مزید مضبوط بنانے پر اتفاق کیا۔

بیان میں کہا گیا ہے کہ ’’بات چیت میں باؤنڈری ستونوں کی مرمت اور دیکھ بھال، سرحد پار مجرمانہ سرگرمیاں، بارڈر ڈسٹرکٹ کوآرڈینیشن کمیٹیوں کا کام، سرحدی انفراسٹرکچر خاص طور پر ICPs، سڑکوں اور ریلوے نیٹ ورکس کو مضبوط بنانا، سیکورٹی سے متعلق مختلف اداروں کو بااختیار بنانا اور صلاحیت کی تعمیر اور آفات کے خطرے میں کمی لانے اور انتظام میں تعاون کو مضبوط بنانے کے طریقے شامل تھے۔‘‘ مزید یہ کہ فریقین نے غیر قانونی ہجرت، انسانی اسمگلنگ، منشیات کی غیر قانونی نقل و حمل اور دیگر سرحدی چیلنجز سے نمٹنے کے لیے قریبی تال میل برقرار رکھنے پر زور دیا۔ دونوں ممالک نے حساس علاقوں میں مشترکہ گشت کو مزید مؤثر بنانے اور خفیہ معلومات کے بروقت تبادلے کی ضرورت پر بھی زور دیا، تاکہ امن و امان کے قیام کو یقینی بنایا جا سکے۔

سب سے اہم بات یہ رہی کہ دونوں ممالک نے ’’مجرمانہ معاملات میں باہمی قانونی مدد‘‘ کے معاہدے کے متن کو حتمی شکل دینے کا خیرمقدم کیا اور نظرثانی شدہ حوالگی کے معاہدے کے جلد اختتام کی طرف کام کرنے پر اتفاق کیا۔ میٹنگ میں باہمی طور پر یہ بھی طے پایا کہ ہوم سکریٹری سطح کی بات چیت کا اگلا دور مناسب تاریخ پر نیپال میں ہوگا۔

بھارت ایکسپریس اردو