West Asia conflict: ’’بھارت اپنے شہریوں کو مشکل میں تنہا نہیں چھوڑتا‘‘: وزیراعظم نے خلیجی ممالک میں پھنسے بھارتیوں کو دلایا مدد کا یقین

وزیراعظم نریندر مودی نے کہا ہے کہ مغربی ایشیا میں جاری تنازع کے دوران خلیجی ممالک میں موجود بھارتی شہریوں کی حفاظت اور سہولت کے لیے حکومت پوری طرح سرگرم ہے۔ بدھ کے روز کیرالا کے شہر ارناکولم میں ایک عوامی جلسے سے خطاب کرتے ہوئے وزیر اعظم نے کہا کہ نیا بھارت اپنے شہریوں کو مشکل حالات میں تنہا نہیں چھوڑتا اور ان کی حفاظت کے لیے ہرممکن کوشش کرتا ہے۔ انہوں نے کہا: ’’آج مغربی ایشیا میں جو حالات ہیں، ان پر آپ سب کا فکرمند ہونا فطری ہے کیونکہ ہمارے لاکھوں بھائی اور بہنیں وہاں کام کرتے ہیں۔ لیکن یہ یاد رکھیں کہ آج ملک میں بی جے پی-این ڈی اے کی حکومت ہے۔ جب بھی کوئی بھارتی شہری مشکل میں پڑا ہے، ہم نے اسے بچانے کے لیے اپنی پوری طاقت لگائی ہے۔‘‘

خلیجی ممالک کا شکریہ

وزیراعظم نریندر مودی نے خلیجی ممالک کی حکومتوں کا شکریہ ادا کرتے ہوئے کہا کہ وہاں موجود بھارتی شہریوں کی اچھی طرح دیکھ بھال کی جا رہی ہے۔ انہوں نے کہا کہ بھارت کے سفارت خانے اور مشن چوبیس گھنٹے اپنے شہریوں کی مدد میں مصروف ہیں اور انہیں خوراک، رہائش اور دیگر ضروری سہولتیں فراہم کی جا رہی ہیں۔

کانگریس پر تنقید

وزیراعظم نے کانگریس پارٹی پر الزام لگایا کہ وہ عالمی بحران کے اس وقت میں بھی سیاسی فائدہ اٹھانے کی کوشش کر رہی ہے۔ انہوں نے کہا کہ کانگریس جان بوجھ کر اشتعال انگیز بیانات دے رہی ہے جس سے حالات خراب ہو سکتے ہیں اور بیرون ملک موجود بھارتی شہری مشکلات میں پڑ سکتے ہیں۔ اپنے خطاب کے دوران وزیراعظم نے کیرالا کے عوام سے اپیل کی کہ وہ ریاست کی ترقی کے لیے بار بار یونائیٹڈ ڈیموکریٹک فرنٹ (UDF) اور لیفٹ ڈیموکریٹک فرنٹ (LDF) کو اقتدار میں لانے کا سلسلہ ختم کریں اور بی جے پی-این ڈی اے کو موقع دیں۔ انہوں نے کہا کہ اگر عوام بی جے پی کو موقع دیں گے تو انہیں ’’وکست کیرالم‘‘ یعنی ترقی یافتہ کیرالا کی جھلک دیکھنے کو ملے گی۔

بھارت ایکسپریس اردو۔