PM Modi mentioned garbage cafes In Mann Ki Baat: ’من کی بات‘ میں وزیراعظم نریندر مودی نے گاربیج کیفے کا کیا ذکر، جہاں پلاسٹک کا کچرا لے جانے پر ملتا ہے کھانا

نئی دہلی: وزیر اعظم نریندر مودی نے آل انڈیا ریڈیو کے پروگرام ’من کی بات‘ کے 127 ویں ایپی سوڈ میں بات کی۔ ’من کی بات‘ میں پی ایم مودی نے صفائی پر بات کی۔ پی ایم مودی نے امبیکاپور اور بنگلورو میں چلائی جارہی صفائی مہم کے بارے میں بات کی۔ انہوں نے جن دو کہانیوں کا ذکر کیا وہ بہت متاثر کن ہیں۔

وزیراعظم نے کہا، ’’ساتھیو! صفائی اور صفائی کے مختلف اقدامات پر مجھے بے شمار پیغامات ملے ہیں۔ میں آپ کے ساتھ ملک کے مختلف شہروں کی کچھ ایسی کہانیاں بانٹنا چاہتا ہوں جو بہت ہی حوصلہ افزا ہیں۔‘‘

پی ایم مودی نے چھتیس گڑھ کے امبیکاپور میں شروع کی گئی ایک انوکھی پہل کا ذکر کرتے ہوئے بتایا کہ وہاں گاربیج کیفے قائم کیے گئے ہیں۔ یہ ایسے کیفے ہیں جہاں پلاسٹک کا کچرا لے کر جانے پر بھر پیٹ کھانا کھلایا جاتا ہے۔ اگر کوئی شخص ایک کلو پلاسٹک لاتا ہے تو اُسے دوپہر یا رات کا کھانا ملتا ہے، اور اگر آدھا کلو لاتا ہے تو ناشتہ فراہم کیا جاتا ہے۔ یہ کیفے امبیکاپور میونسپل کارپوریشن کے تحت چلائے جا رہے ہیں۔

وہیں، وزیراعظم نے بنگلورو میں جھیلوں کی صفائی کے لیے جاری ایک مہم کا ذکر کیا، جس کی قیادت انجینئر کپل شرما کر رہے ہیں۔ انہوں نے کہا، ’’بنگلورو جھیلوں کا شہر ہے، اور کپل ان جھیلوں کو نیا جیون دے رہے ہیں۔ اُن کی ٹیم نے اب تک بنگلورو اور آس پاس کے علاقوں میں 40 کنویں اور 6 جھیلیں دوبارہ زندہ کر دی ہیں۔‘‘

انہوں نے مزید کہا، ’’کپل نے اپنے مشن میں کارپوریٹ اداروں اور مقامی لوگوں کو بھی شامل کیا ہے۔ اُن کی تنظیم درخت لگانے کے کام سے بھی وابستہ ہے۔‘‘ مودی نے کہا کہ امبیکاپور اور بنگلورو کی یہ مثالیں ہمیں یہ سکھاتی ہیں کہ اگر ہم پختہ ارادہ کر لیں تو تبدیلی آ کر رہتی ہے۔

اس کے علاوہ وزیراعظم نے ان نوجوان سوشل میڈیا انفلوئنسرز کی بھی تعریف کی جو سنسکرت زبان میں ویڈیوز بنا کر زبان و ثقافت کو فروغ دے رہے ہیں۔ مودی نے کہا کہ ان نوجوانوں کی یہ کوششیں واقعی قابلِ ستائش ہیں۔

بھارت ایکسپریس۔