IMF List India UPI As World Largest Payment : آئی ایم ایف نے بھارت کے یوپی آئی کو دنیا کے سب سے بڑے ریئل-ٹائم پیمنٹ سسٹم کے طور پر دی منظوری

نئی دہلی: بین الاقوامی مالیاتی فنڈ (آئی ایم ایف) نے بھارت کے یونیفائیڈ پیمنٹ انٹرفیس (یوپی آئی) کو لین دین کی مجموعی تعداد کی بنیاد پر دنیا کے سب سے بڑے ریئل-ٹائم پیمنٹ سسٹم کے طور پر منظوری دی ہے۔ حکومت نے پیر کو یہ اطلاع دیتے ہوئے بتایا کہ یہ اعتراف آئی ایم ایف کی جون 2025 میں جاری ہونے والی رپورٹ “بڑھتے ہوئے ریٹیل ڈیجیٹل ادائیگیاں: انٹرآپریبلٹی کی اہمیت” میں کیا گیا ہے۔ اس رپورٹ نے یوپی آئی کو عالمی ڈیجیٹل ادائیگیوں کے منظرنامے میں ایک غیر معمولی کامیابی قرار دیا۔

لوک سبھا میں ایک سوال کے تحریری جواب میں وزیرِ مملکت برائے مالیات پنکج چودھری نے کہا کہ آئی ایم ایف کی یہ رپورٹ بھارت کے ڈیجیٹل انحصار اور شہریوں کی بڑھتی ہوئی آن لائن ادائیگیوں کے رجحان کی تصدیق کرتی ہے۔ انہوں نے بتایا کہ یوپی آئی نہ صرف بھارت بلکہ پوری دنیا کے لیے ایک مضبوط، محفوظ اور کم لاگت ادائیگی ماڈل کے طور پر ابھرا ہے۔

ایک دوسری بین الاقوامی رپورٹ اے سی آئی ورلڈ وائڈ کی پرائم ٹائم فار رئیل ٹائم 2024 کے مطابق بھی یوپی آئی عالمی رئیل ٹائم ادائیگیوں میں 49 فیصد حصے اور 129.3 ارب لین دین کے ساتھ پہلے مقام پر ہے۔ اس عالمی درجہ بندی میں برازیل 14 فیصد حصے اور 37.4 ارب لین دین کے ساتھ دوسرے نمبر پر ہے، جب کہ تھائی لینڈ 8 فیصد اور 20.4 ارب لین دین کے ساتھ تیسرے نمبر پر ہے۔ چین 6 فیصد حصے اور 17.2 ارب لین دین کے ساتھ فہرست میں چوتھے مقام پر ہے۔

حکومت نے مزید بتایا کہ چھوٹے تاجروں اور کاروباریوں کو ڈیجیٹل ادائیگی نظام، خصوصاً یوپی آئی کو اپنانے میں سہولت دینے کے لیے کئی اقدامات کیے گئے ہیں۔ ان میں کم قیمت بی ایچ آئی ایم-یوپی آئی ادائیگیوں کو فروغ دینے کے لیے ترغیبی اسکیم اور پیمنٹ انفراسٹرکچر ڈیولپمنٹ فنڈ (پی آئی ڈی ایف) شامل ہے۔ اس فنڈ کے ذریعے ٹائر-3 سے ٹائر-6 شہروں میں پی او ایس مشینوں اور کیو آر کوڈز کی تنصیب کے لیے بینکوں اور فِن ٹیک کمپنیوں کو مالی مدد فراہم کی جاتی ہے۔

وزیر نے بتایا کہ 31 اکتوبر 2025 تک پی آئی ڈی ایف فنڈ کی مدد سے ان علاقوں میں تقریباً 5.45 کروڑ ڈیجیٹل ٹچ پوائنٹس قائم کیے جا چکے ہیں، جب کہ مالی سال 2024-25 تک ملک بھر کے تقریباً 6.5 کروڑ تاجروں کے لیے 56.86 کروڑ کیو آر کوڈ نصب کیے گئے ہیں۔ انہوں نے کہا کہ حکومت، آر بی آئی اور این پی سی آئی ملک بھر میں پبلک سروسز، ٹرانسپورٹ اور ای کامرس پلیٹ فارمز میں روپے اور یوپی آئی کے استعمال کو مزید فروغ دینے کے لیے مسلسل کوششیں کر رہے ہیں۔

بھارت ایکسپریس اردو