IIT Kanpur Suicide Case: آئی آئی ٹی کانپور میں پی ایچ ڈی کے طالب علم نے کی خودکشی، 23 دنوں میں دوسرا واقعہ، کیمپس میں ہلچل

کانپور: انڈین انسٹی ٹیوٹ آف ٹیکنالوجی (آئی آئی ٹی) کانپور ایک بار پھر طالب علم کی خودکشی کے واقعے سے دہل گیا ہے۔ ارتھ سائنس کے پی ایچ ڈی کے طالب علم رام سوروپ ایشورم نے کیمپس میں واقع ایک عمارت کی چھٹی منزل سے کود کر اپنی جان دے دی۔ یہ واقعہ گزشتہ 23 دنوں میں پیش آنے والا دوسرا خودکشی کا معاملہ ہے، جس کے بعد تعلیمی ادارے میں غم اور تشویش کا ماحول پیدا ہو گیا ہے۔ ادارے سے موصولہ معلومات کے مطابق یہ افسوسناک واقعہ منگل کی دوپہر تقریباً ایک بج کر 30 منٹ پر پیش آیا۔ بتایا گیا ہے کہ رام سوروپ ایشورم اچانک کیمپس کی ایک عمارت کی چھٹی منزل پر گئے، کچھ دیر وہاں رکے اور پھر نیچے چھلانگ لگا دی۔ واقعے کے فوراً بعد ادارے کی انتظامیہ اور سکیورٹی عملہ موقع پر پہنچا اور شدید زخمی حالت میں طالب علم کو ایک نجی اسپتال منتقل کیا گیا، جہاں ڈاکٹروں نے معائنے کے بعد انہیں مردہ قرار دے دیا۔

جان دینے والے طالب علم کی شناخت رام سوروپ ایشورم کے طور پر ہوئی ہے، جو آئی آئی ٹی کانپور میں ارتھ سائنس شعبے سے پی ایچ ڈی کر رہے تھے۔ واقعے کی خبر پھیلتے ہی پورے کیمپس میں سوگ کی لہر دوڑ گئی اور طلبہ و اساتذہ میں شدید صدمہ پایا جاتا ہے۔ آئی آئی ٹی کانپور کے ڈپٹی ڈائریکٹر پروفیسر برج بھوشن نے اس واقعے کی تصدیق کرتے ہوئے بتایا کہ رام سوروپ ایشورم شادی شدہ تھے اور اپنی اہلیہ اور بچوں کے ساتھ کیمپس میں ہی رہائش پذیر تھے۔ انہوں نے کہا کہ اس سانحے سے پورا آئی آئی ٹی خاندان غمزدہ ہے اور ادارہ متاثرہ خاندان کے ساتھ کھڑا ہے۔

اعداد و شمار پر نظر ڈالیں تو یہ معاملہ اور بھی تشویشناک ہو جاتا ہے۔ گزشتہ دو برسوں میں آئی آئی ٹی کانپور کے کیمپس میں آٹھ طلبہ خودکشی کر چکے ہیں۔ صرف سال 2025 میں تین طلبہ اور ایک سافٹ ویئر ڈیولپر نے خودکشی کی تھی، جبکہ دسمبر 2023 سے جنوری 2024 کے درمیان بھی تین طلبہ نے اپنی جان لی تھی۔ ان واقعات نے ادارے میں ذہنی دباؤ اور تعلیمی تناؤ کے مسئلے کو ایک بار پھر اجاگر کر دیا ہے۔

طلبہ کے درمیان دبے لفظوں میں یہ بات کہی جا رہی ہے کہ سخت تعلیمی مقابلہ، ریسرچ کا دباؤ اور مستقبل کی غیر یقینی صورتحال کئی طلبہ کو ذہنی دباؤ کی طرف دھکیل دیتی ہے۔ آئی آئی ٹی کے کاؤنسلرز کا کہنا ہے کہ اگرچہ یہ تعداد مجموعی طلبہ کے مقابلے میں کم ہے، لیکن کچھ طلبہ اضافی تعلیمی دباؤ کو برداشت نہیں کر پاتے۔ دوسری جانب کانپور پولیس کے ڈپٹی کمشنر کے مطابق ابتدائی تفتیش میں سامنے آیا ہے کہ طالب علم ڈپریشن کا شکار تھا اور اس کی کئی بار کاؤنسلنگ بھی کی جا چکی تھی۔ پولیس طالب علم کی اہلیہ اور بیٹی سے بھی بات چیت کر رہی ہے۔ لاش کو پوسٹ مارٹم کے لیے بھیج دیا گیا ہے اور رپورٹ آنے کے بعد آئندہ قانونی کارروائی عمل میں لائی جائے گی۔

بھارت ایکسپریس اردو۔