Lynching in UP minor beaten to death with stick: اتر پردیش میں ظلم کی انتہا: بجنور میں ماب لنچنگ، نابالغ ارمان کو ڈنڈے سے پیٹ پیٹ کر کر دیا ہلاک، ملزمین فرار

گزشتہ کچھ برسوں سے  ملک میں اقلیتوں کے خلاف  ہجومی تشدد  کے واقعات میں اضافہ ہوتا جا رہا ہے  تازہ معاملہ اتر پردیش کے نجیب آباد کے جلال آباد علاقے میں پیش آیا ہے  جہاں نامعلوم حملہ آوروں نے ایک  15 سالہ نوجوان پرلاٹھی  ڈنڈوں سے حملہ کرکے اسے ہلاک کردیا۔ بچہ سڑک پر دم توڑ گیا۔ پنچایت گھر کے قریب پیش آئے اس قتل نے لوگوں کو چونکا دیا ہے۔ ملزمین ارتکاب جرم کے بعد موقع سے فرار ہوگئے۔ پولیس نے لاش کو پوسٹ مارٹم کے لیے بھیج دیا ہے۔

نامعلوم حملہ آور

سی او نتیش پرتاپ سنگھ نے بتایا کہ نجیب آباد تھانہ علاقے کے جلال آباد چوکی میں واقع پنچایت گھر کے نزدیک نامعلوم بھیڑ نے 15 سالہ ارمان پر لاٹھی ڈنڈوں سے حملہ کیا، جس سے وہ شدید زخمی ہوگیا۔ لوگوں نے نوجوان کو زمین پر درد سے کراہتے ہوئے دیکھا۔ محلے دار بچے کو اسپتال لے گئے تو ڈاکٹر نے اسے مردہ قرار دے دیا۔

ارمان کے چہرے پر شدید زخم تھے

سی او نتیش پرتاپ سنگھ نے بتایا کہ جلال آباد کے شیخ سرائے کے رہنے والے محبوب مرحوم کا بیٹا ارمان راہوکھیڑی میں کرائے کے مکان میں اپنے خاندان کے ساتھ رہ رہا تھا۔ منگل کو صبح 8 بجے کچھ لوگوں نے جلال آباد پنچایت ہاؤس کے نزدیک ارمان کو سڑک پر خون میں لت پت پایا۔ ارمان کے چہرے پر شدید زخم تھے۔ پاس ہی ایک لاٹھی پڑی تھی۔ اطلاع ملنے پر پولیس موقع پر پہنچ گئی۔

ٹائر پنکچر کی مرمت کی دکان پر کام کرتا تھا

زخمی بچے کو قریبی نجی اسپتال لے جایا گیا، جہاں ڈاکٹروں نے اسے مردہ قرار دے دیا۔ ارمان ٹائر پنکچر کی مرمت کی دکان پر کام کرتا تھا۔ اطلاع ملنے پر سی او نتیش پرتاپ سنگھ اور اسٹیشن ہاؤس آفیسر راہل سنگھ پولیس ٹیم کے ساتھ جائے وقوعہ پر پہنچے۔ نوجوان کی موت سے مشتعل اس کے گھر والے اسپتال پہنچے اور ہنگامہ کھڑا کردیا۔ پولیس نے لاش کو پوسٹ مارٹم کے لیے بجنور بھیج دیا۔

بھارت ایکسپریس اردو۔