Gyanvapi Masjid Case: گیان واپی سے متعلق ہندو فریق کو دعوے کو مسلم فریق نے کیا مسترد، مندر توڑ کر مسجد نہیں بنائی گئی

وارانسی کے گیان واپی مسجد میں ہوئے تین مہینے تک کے اے ایس آئی سروے کی رپورٹ آخر کار ہندواورمسلم فریق کو سونپ دی گئی ہے۔ مسلم فریق کی طرف سے ہندو فریق کے دعووں کو ایک بارپھرخارج کیا جا رہا ہے۔ مسلم فریق کی طرف سے 839 صفحات پر مشتمل رپورٹ کو ریسیوکرنے والے انجمن انتظامیہ مساجد کمیٹی کے وکیل اخلاق احمد نے بیان دیا ہے۔ انہوں نے ہندو فریق کے دعوے کو خارج کردیا ہے۔ ان کا کہنا ہے کہ مندر کو توڑ کر کبھی مسجد بنائی ہی نہیں گئی ہے اوروہ مطالعہ کے بعد اے ایس آئی سروے رپورٹ کے خلاف عدالت میں اعتراض بھی داخل کرسکتے ہیں۔

اخلاق احمد کا کہنا ہے کہ ہندو فریق جو دعویٰ کررہا ہے وہ سراسرغلط ہے کیونکہ ایسی کوئی بات سروے رپورٹ میں نہیں کہی گئی ہے۔ اس رپورٹ میں وہی سب باتیں ہیں جو پہلے ایڈوکیٹ کمیشن کی کارروائی میں آچکی ہیں۔ گزشتہ کمیشن کے جائزے میں جو چیزیں سامنے آئی تھیں، وہی چیزیں اس رپورٹ میں بھی سامنے آئی ہیں، بس فرق صرف اتنا ہے کہ اے ایس آئی کی رپورٹ میں ان چیزوں کا ذکر پیمائش کے ساتھ کیا گیا ہے۔

گیان واپی مسجد میں اے ایس آئی رپورٹ میں ہندو دیوی دیوتاؤں کے ذکرسے متعلق ایڈوکیٹ اخلاق احمد نے کہا کہ وہ مورتیاں علامتی نہیں ہیں۔ وہ مندرکے ملبے سے ملی ہوں گی۔ کیونکہ مسجد کی ایک بلڈنگ تھی، جسے نارتھ یارڈ گیٹ کے نام سے جانتے تھے۔ جہاں پانچ کرائے دار رہتے تھے، جو پتھروں کی مورتیوں کی بناتے تھے اور بیریکیڈنگ کے پہلے پورا علاقہ کھلا ہوتا تھا تو ملبے میں مورتیوں کے ملبے کو پھینک دیا جاتا تھا۔ اس ملبے میں ہی مورتیوں کو پایا گیا ہوگا۔ یہ تصدیق شدہ بات نہیں ہے۔