Delhi High Court: معذوروں اور بزرگ شہریوں کے لیے عوامی سہولیات کو یقینی بنائیں: ہائی کورٹ نے دہلی حکومت کو دی ہدایت

نئی دہلی: دہلی ہائی کورٹ نے دہلی حکومت سے کہا ہے کہ وہ معذوروں اور بزرگ شہریوں کے لیے فٹ اوور برج اور دیگر عوامی سہولیات تک رسائی کو یقینی بنانے کے معاملے پر گہرائی سے سوچے۔ قائم مقام چیف جسٹس ویبھو بکھرو اور جسٹس تشار راؤ گیڈیلا کی بنچ نے حکومت کو ہدایت دی کہ تمام فٹ اوور برجز کو معذوروں کے لیے موافق بنایا جائے۔ انہوں نے یہ ہدایت پی ڈبلیو ڈی حکام کے بیان پر دی۔

پی ڈبلیو ڈی حکام نے سماعت کے دوران بنچ کو بتایا کہ کچھ جگہوں پر لفٹیں یا ریمپ بنانے کی جگہ نہیں ہے۔ اس پر بنچ نے ان سے کہا کہ وہ اس کے لیے متبادل انتظامات کرنے کا امکان تلاش کریں۔ ساتھ ہی معاملے پر رپورٹ پیش کرنے کا کہہ کر سماعت ملتوی کر دی۔ اس سے قبل حکومت نے عدالت کو بتایا تھا کہ 110 فٹ اوور برجوں میں سے 36 پل معذوروں کے لیے آسان ہیں۔

درخواست میں مطالبہ کیا گیا ہے کہ معذوروں اور بزرگ شہریوں کے لیے لفٹ، فٹ اوور برج اور دیگر عوامی سہولیات کو یقینی بنایا جائے اور اس کے لیے حکومت اور متعلقہ محکموں کو ہدایات دی جائیں۔ اس کا یہ بھی کہنا ہے کہ جہاں فٹ اوور برج ہے اور لفٹیں لگائی گئی ہیں وہاں لفٹیں کام نہیں کر رہیں۔ کئی مقامات پر ایسکلیٹرز بھی ہیں، جو کام نہیں کر رہے۔ اس سے ان کے حقوق کی خلاف ورزی ہوتی ہے۔