Delhi LG VK Saxena showers Praise on CM Atishi: ایل جی وی کے سکسینہ ہوئے وزیراعلیٰ آتشی کے مرید، اروند کیجریوال سے موازنہ کرتے ہوئے کہی یہ بڑی بات

نئی دہلی: کسی نہ کسی مسئلے سے متعلق دہلی حکومت اورلیفٹیننٹ گورنر(ایل جی) کے درمیان تکرارکی صورتحال ہمیشہ بنی رہتی ہے۔ تاہم جمعہ (22 نومبر) کواس کے برخلاف ایک ایسا بھی منظردیکھنے کو ملا، جب ایل جی وی کے سکسینہ نے وزیراعلیٰ آتشی کی تعریفوں کے پُل باندھے۔ انہوں نے یہاں تک کہہ دیا کہ وہ سابق وزیراعلیٰ اروند کیجریوال کے مقابلے میں کئی گنا بہترہیں۔

لیفٹیننٹ گورنروی کے سکسینہ نے اندرا گاندھی دہلی تکنیکی خواتین یونیورسٹی کے ساتویں کانووکیشن تقریب کو خطاب کرتے ہوئے اروند کیجریوال کا نام لئے بغیرکہا، ’’دہلی کی وزیراعلیٰ ایک خاتون ہیں اورمیں پورے یقین کے ساتھ کہہ سکتا ہوں کہ وہ اپنے سابق وزیراعلیٰ سے ہزارگنا بہترہیں۔‘‘

لیفٹیننٹ گورنرنے کہی یہ بڑی بات

پروگرام میں وزیراعلیٰ آتشی بھی موجود تھیں۔ ایل جی سکسینہ نے طلبا کوخطاب کرتے ہوئے کہا کہ جیسے جیسے آپ آگے بڑھتے ہیں، زندگی میں چارگائیڈ ابھرکرسامنے آتے ہیں۔ پہلا، آپ خود ہوتے ہیں، آپ کی خود کے تئیں بھی کچھ ذمہ داریاں ہوتی ہیں، جنہیں آپ کونبھانا ہوتا ہے۔ اس کے بعد آپ کے والدین۔ آپ کے والدین کے تئیں بھی آپ کی ذمہ داریاں ہوتی ہیں۔ اس کے بعد آپ کا سماج۔ انہوں نے مزید کہا کہ ‘اس کے بعد آپ کی چوتھی ذمہ داری یہ ہے کہ آپ خود کوایک ایسی خاتون کے طور پرثابت کریں، جس نے تعصب کی تمام دیواریں گرا دیں اور ہرمیدان میں فتح کا جھنڈا لہرایا۔ لیکن، آپ ان تمام ذمہ داریوں کواسی وقت نبھا سکیں گے، جب آپ خود خوشحال ہوں گے اورتعلیم آپ کی خوشحالی میں انمول کردارادا کرے گی

عام آدمی پارٹی بنام دہلی ایل جی

گزشتہ ستمبر مہینے میں اروند کیجریوال کے استعفیٰ دینے کے بعد آتشی نے دہلی کے وزیراعلیٰ کے طور پر حلف لیا تھا۔ استعفیٰ دینے کے بعد کیجریوال نے کہا تھا کہ وہ اپنے اوپر لگے بدعنوانی کے الزامات کے پیش نظر عوام سے ایمانداری کا سرٹیفکیٹ مانگیں گے۔ دہلی میں عام آدمی پارٹی کی حکومت گزشتہ کچھ وقت سے اقتداراور نوکرشاہی پرکنٹرول سے متعلق کئی موضوعات پر لیفٹیننٹ گورنر کے ساتھ اختلافات دیکھنے کو ملتے رہے ہیں۔

گزشتہ ماہ ہی عام آدمی پارٹی کے کئی لیڈران کو حراست میں لیا گیا تھا، کیونکہ وہ شہر میں بس مارشلوں کے موضوع پر ایل جی کی رہائش گاہ کے باہراحتجاجی مظاہرہ کررہے تھے۔ بس مارشل گزشتہ سال اکتوبرمیں وی کے سکسینہ کے ذریعہ ان کی خدمات ختم کئے جانے کے بعد سے ہی اپنی بحالی کے لئے احتجاجی مظاہرہ کر رہے ہیں۔ اس سے پہلے اگست میں دہلی حکومت نے دہلی حکومت کے اسپتالوں اور ڈسپنسریوں میں سیوا محکمہ کے ذریعہ سے داخلہ عمل شروع نہیں کرنے کے لئے لیفٹیننٹ گورنر وی کے سکسینہ کو قصوروار ٹھہرایا تھا۔