Delhi Congress Candidates List Election 2025: دہلی کانگریس جلد کرے گی امیدواروں کا اعلان، الکا لانبا، ہارون یوسف سندیپ دکشت اورعلی مہدی کا نام ہوگا فائنل!

Delhi Congress Candidates List 2025: دہلی اسمبلی الیکشن سے متعلق کانگریس کے امیدواروں کی پہلی فہرست اس ہفتے جاری ہوسکتی ہے۔ ذرائع کے مطابق، آئندہ دوسے تین دن میں کانگریس الیکشن کمیٹی کی میٹنگ ہوسکتی ہے، جس میں تقریباً دودرجن امیدواروں کے نام پرمہرلگ سکتی ہے۔

ذرائع کے مطابق، اپنی پہلی لسٹ میں کانگریس الکا لانبا کونئی دہلی سے، ریاستی صدردیویندریادوکوبادلی سے، سندیپ دکشت کوبابرپور سے، ہارون یوسف کوبلیماران سے امیدواربنایا جاسکتا ہے۔ ابھیشیک دت کوکستوربا نگرسے، مدت اگروال کوچاندنی چوک سے، روہت چودھری کونانگلوئی سے، علی مہدی کومصطفیٰ آباد سے ٹکٹ دیا جاسکتا ہے۔ اوکھلا اسمبلی حلقہ سے سابق رکن اسمبلی آصف محمد خان کی بیٹی اریبہ خان یا سابق رکن اسمبلی پرویزہاشمی کی بہواورسابق کونسلرعشرت جہاں کوٹکٹ مل سکتا ہے۔ یہاں پرٹکٹ آصف محمد خان اورپرویزہاشمی دونوں خاندانوں کے لئے کافی اہم مانا جا رہا ہے کیونکہ دونوں اپنی طاقت دکھانے کے لئے سخت جدوجہد کررہے ہیں۔ حالانکہ کانگریس سے پرویزعالم خان، عارفہ خان، زیبا خان سمیت درجن بھر سے زیادہ دعویدار ہیں، لیکن ابھی معاملہ دونوں سینئرلیڈران کے درمیان سمٹ گیا ہے۔

اسمبلی الیکشن اپنے دم پرلڑے گی کانگریس

واضح رہے کہ کانگریس نے دہلی اسمبلی الیکشن اکیلے لڑنے کا فیصلہ کیا ہے۔ پارٹی عام آدمی پارٹی کے ساتھ یہاں الائنس نہیں کرے گی۔ انڈیا الائنس میں شامل دونوں پارٹیوں نے دہلی میں الگ الگ لڑنے کا اعلان کیا ہے۔ آپ کوبتا دیں کہ لوک سبھا الیکشن 2024 میں دونوں پارٹیوں نے دہلی اورہریانہ میں الائنس کیا تھا، لیکن پنجاب میں دونوں الگ الگ لڑی تھیں۔ دہلی میں الائنس کو کوئی فائدہ نہیں ہوا تھا اور بی جے پی سبھی ساتوں سیٹوں پرجیت حاصل کرنے میں کامیاب ہوئی تھی۔

یہ بھی پڑھیں: AAP Candidate List 2025: دہلی اسمبلی الیکشن کے لئے عام آدمی پارٹی کی دوسری فہرست جاری، منیش سسودیا کی سیٹ تبدیل، اودھ اوجھا کو بھی ملا ٹکٹ

عام آدمی پارٹی نے جاری کی دو فہرست

آپ کو بتادیں کہ عام آدمی پارٹی نے دہلی اسمبلی الیکشن کے مدنظراپنی دوفہرست جاری کردی ہیں۔ ان میں پارٹی نے اب تک کل 31 امیدواروں کے نام کا اعلان کیا ہے۔ عام آدمی پارٹی نے پہلی فہرست میں 11 اوردوسری فہرست میں 20 امیدواروں کوانتخابی میدان میں اتارا ہے۔ اس فہرست میں پٹپڑگنج کے رکن اسمبلی اورسابق نائب وزیراعلیٰ منیش سسودیا کی جگہ اودھ اوجھا کوٹکٹ دیا گیا ہے۔ وہیں مصطفیٰ آباد کے رکن اسمبلی حاجی محمد یونس کا ٹکٹ کاٹ دیا گیا ہے اوران کی جگہ عادل احمد خان کوامیدواربنایا گیا ہے۔ عام آدمی پارٹی نے کانگریس اوربی جے پی سے آنے والے لیڈران پربھروسہ جتایا ہے۔