Delhi Assembly Elections 2025: گیارہ بجے تک دہلی میں قریب 20 فیصد ہوئی ووٹنگ،اب تک پرامن ماحول میں ڈالے جارہے ہیں ووٹ

دہلی اسمبلی انتخابات کیلئے ووٹنگ کا عمل جاری ہے۔ صبح سات بجے سے جاری ووٹنگ کے اس عمل میں دو پہر گیار بجے تک 19.95 فیصد ووٹنگ ہوئی ہے۔ حالانکہ یہ رفتار ابھی بھی کچھ حدتک سست دکھائی دے رہی ہے البتہ دوپہر بعد رفتار میں تیزی کی امید ہے۔بتادیں کہ  نارتھ ایسٹ میں سب سے زیادہ ووٹنگ ہوئی ہے جہاں 24.87 فیصد ووٹ ڈالے گئے ہیں ۔وہیں دہلی کے دیگر اضلاع میں رفتار کچھ کم ہے، سینٹرل دہلی میں 16.46 فیصد،ایسٹ دہلی میں 20.3فیصد،نئی دہلی میں 16.80فیصد،نارتھ دہلی میں 18.63فیصد،نارتھ ویسٹ میں 19.75فیصد،شاہدراضلع میں 23.30فیصد اورساوتھ دہلی میں 19.75فیصد ووٹنگ ہوئی ہے۔

بتادیں کہ آج دارالحکومت دہلی  میں اسمبلی انتخابات ہورہےہیں۔ دہلی کی تمام 70 سیٹوں پر ووٹنگ صبح 7 بجے سےجاری  ہے جوکہ شام 5 بجے تک جاری رہے گی۔ اس دوران دہلی کے 1.56 کروڑ ووٹر اپنے حق رائے دہی کا استعمال کررہے ہیں اور تقریباً 700 امیدواروں کی قسمت کا فیصلہ کرنے کیلئے گھروں سے نکل کر پولنگ بوتھ پہنچ رہے ہیں۔ نتائج کا اعلان 8 فروری کو کیا جائے گا۔

اس انتخاب میں جہاں عام آدمی پارٹی تیسری بار اقتدار حاصل کرنے کی لڑائی میں مصروف ہے وہیں بی جے پی اور کانگریس بھی تخت دہلی پر قبضہ کرنے کی جدوجہد  کررہی  ہیں۔ بی جے پی 25 سال سے زیادہ عرصے سے اقتدار سے باہر ہے۔ وہیں عام آدمی پارٹی سے پہلے کانگریس 15 سال اقتدار میں تھی، لیکن پچھلے دو انتخابات میں پارٹی ایک بھی سیٹ جیتنے میں کامیاب نہیں ہو سکی ہے۔

آپ کو بتادیں کہ قومی دارالحکومت میں تمام 70 اسمبلی سیٹوں کے لیے 13,766 پولنگ بوتھ بنائے گئے ہیں۔ 699 امیدوار میدان میں ہیں۔ شفاف ووٹنگ کو یقینی بنانے کے لیے نیم فوجی دستوں کی 220 کمپنیاں، 35,626 دہلی پولیس اہلکار اور 19,000 ہوم گارڈز تعینات کیے گئے ہیں۔ 3000 کے قریب پولنگ اسٹیشنز کو حساس قرار دیا گیا ہے، جہاں سکیورٹی کے سخت انتظامات کیے گئے ہیں۔ ووٹنگ کے دوران پولیس ٹیم ڈرون کے ذریعے بھی نظر رکھنے کی کوشش کررہی ہے۔

بھارت ایکسپریس۔