CM Yogi Adityanath Initiative Marks a Historic Step for Media Empowerment : اتر پردیش میں صحافیوں کی فلاح کے لیے 80.31 لاکھ روپے کا صحافی فلاحی فنڈ منظور، وزیراعلیٰ یوگی آدتیہ ناتھ کا تاریخی فیصلہ

اتر پردیش حکومت نے ریاستی صحافیوں کی سماجی سلامتی اور بہبود کے لیے ایک اہم قدم اٹھاتے ہوئے ’’پترکار کلیان کوش‘‘ (صحافی فلاحی فنڈ) کے قیام کی منظوری دے دی ہے۔ اس فنڈ میں 80.31 لاکھ روپے کی رقم مختص کی گئی ہے۔

یہ پیش رفت اس وقت سامنے آئی جب حال ہی میں بی جے پی لیڈر راجیشور سنگھ نے وزیراعلیٰ یوگی آدتیہ ناتھ سے ملاقات کے دوران ریاست کے صحافیوں کے لیے ایک مستقل فلاحی فنڈ قائم کرنے کی تجویز پیش کی تھی۔ وزیراعلیٰ نے اس تجویز کو سنجیدگی سے لیتے ہوئے اس پر فوری عملدرآمد کی ہدایت دی۔

اطلاعات کے مطابق، یہ فیصلہ ریاستی حکومت کے اُس عزم کو ظاہر کرتا ہے جو صحافیوں کی عزت، سلامتی اور باوقار پیشہ ورانہ زندگی کے تحفظ سے متعلق ہے۔ اس اقدام کو ریاست کے میڈیا حلقوں میں تاریخی اور انقلابی قدم قرار دیا جا رہا ہے۔ وزیراعلیٰ یوگی آدتیہ ناتھ کے وژنری اور حساس قیادت میں منظور شدہ یہ فنڈ نہ صرف صحافیوں کے اعتماد کو مضبوط کرے گا بلکہ میڈیا کے تئیں حکومت کی مثبت سوچ کو بھی اجاگر کرتا ہے۔

اس موقع پر تجویز پیش کرنے والے بی جے پی لیڈر راجیشور سنگھ نے کہا کہ ’’یہ فیصلہ اتر پردیش کے میڈیا ورکرز کے لیے اعتماد اور خوداعتمادی کی نئی بنیاد رکھے گا‘‘۔ انہوں نے وزیراعلیٰ یوگی آدتیہ ناتھ کا شکریہ ادا کرتے ہوئے کہا کہ ’’صحافی سچائی کی مشعل ہیں، جو اندھیرے میں بھی روشنی پھیلانے کا حوصلہ رکھتے ہیں‘‘۔ انہوں نے مزید کہا کہ صحافی سماج کا آئینہ ہیں اور ان کے بااختیار ہونے میں جمہوریت کی مضبوطی پوشیدہ ہے اور آخر میں انہوں نے وزیراعلیٰ یوگی آدتیہ ناتھ کا شکریہ بھی ادا کیا۔ ریاستی حکومت کے اس اقدام کو صحافتی برادری نے زبردست خیرمقدم کیا ہے اور اسے اتر پردیش کے میڈیا سیکٹر میں اعتماد بحالی کا سنگ میل قرار دیا ہے۔

-بھارت ایکسپریس اردو