Chinook dummy helicopter stolen: لکھنو سے جنگی ہیلی کاپٹر غائب،ایک سال بعد بھی نہیں ملی کوئی جانکاری، ڈیفنس ایکسپو میں نمائش کیلئے کیا گیا تھا پیش

لکھنؤ شہر سے ایک چونکا دینے والا معاملہ سامنے آیا ہے جس نے ہر طرف ہلچل مچا دی ہے۔ دراصل یہ سارا معاملہ ڈیفنس ایکسپو سے جڑا ہوا ہے۔ جس کا اہتمام 10 فروری 2020 کو ورنداون یوجنا میں کیا گیا تھا۔ اس میں ڈیفنس ریسرچ اینڈ ڈیولپمنٹ آرگنائزیشن (DRDO) میں بنایا گیا جنگی ہیلی کاپٹر (Chinook) دکھایا گیا تھا۔ یہ ہیلی کاپٹر غائب ہو گیا ہے۔ ہیلی کاپٹر چوری ہوا یا کہاں گیا؟ اس کا جواب میونسپل کارپوریشن کے ذمہ داروں کے پاس نہیں ہے۔قابل ذکر ہے کہ سال 2020 میں ڈیفنس ایکسپو کے دوران ڈی آر ڈی او نے اسکریپ سے بنے چنوک ہیلی کاپٹر کے ماڈل کو انٹری گیٹ کے قریب نمائش کے لیے رکھا تھا۔ ایکسپو میں لوگوں  نے ہیلی کاپٹر کے اس ماڈل کے ساتھ سیلفیاں بھی لیں۔ ایکسپو ختم ہونے کے بعد بھی ہیلی کاپٹر لوہے کے مضبوط پلیٹ فارم پر کھڑا رہا۔ اس کی دیکھ بھال کی ذمہ داری میونسپل کارپوریشن کی تھی۔

اس ہیلی کاپٹر کے غائب ہونے کی ایک تحریری شکایت اپریل 2023 میں شہری ترقی کے محکمے کے جوائنٹ سکریٹری کلیان بنرجی کو دی گئی تھی۔ جس کے بعد معاملہ سامنے آیا لیکن اب تک اس معاملے کی تحقیقات نہیں ہوسکی کہ ہیلی کاپٹر کہاں گیا۔ اب میونسپل کارپوریشن نے اس معاملے پر مکمل خاموشی اختیار کر رکھی ہے۔فروری 2023 میں منعقد ہونے والے G-20 سمٹ پروگرام سے پہلے، کارپوریشن نے ہیلی کاپٹر کے کمزور ستون اور علاقے میں VIP موومنٹ کا حوالہ دیتے ہوئے اس ہیلی کاپٹر کو ہٹا دیا۔

اس کے بعد ہیلی کاپٹر کا کیا ہوا کسی کو معلوم نہیں۔ شکایت کے بعد کلیان بنرجی نے لکھنؤ میونسپل کارپوریشن کے افسران سے پوچھا کہ ہیلی کاپٹر کہاں گیا؟ اس وقت میونسپل کارپوریشن زون-8 کے زونل سینیٹری افسر راجیش جھا نے تحریری جواب دیا کہ ہیلی کاپٹر کو گومتی نگر میں واقع کارپوریشن کی رابش اینڈ ریموویبل (RR) ورکشاپ میں مرمت کے لیے بھیجا گیا ہے۔ جب موجودہ آر آر چیف منوج پربھات سے بات کی گئی تو انہوں نے کہا کہ ایسا کوئی ہیلی کاپٹر ورکشاپ میں نہیں آیا۔ اور نہ ہی اس کا ماضی میں کوئی اندراج ہے۔ ایسے میں اب ایک بڑا سوال اٹھ رہا ہے کہ ہیلی کاپٹر کہاں گیا؟

کانگریس کی ترجمان سوپریہ  شرینٹ نے اس پر سوال اٹھایا ہے۔ انہوں نے اپنے ایکس اکاونٹ پر لکھا ہے کہ کیا آپ کو وزیر داخلہ امت شاہ کا وہ بیان یاد ہے جس میں انہوں نے کہا تھا کہ اتر پردیش میں خواتین رات کے 12 بجے بھی سونے کے زیورات پہن کر محفوظ طریقے سے گھوم سکتی ہیں؟ تو ابھی اتر پردیش کی راجدھانی لکھنؤ میں ڈی آر ڈی او کا بنایا ہوا ماڈل ہیلی کاپٹر چوری ہو گیا اور کسی کو اس کی خبر تک نہیں ہوئی۔ڈی آر ڈی او میں بنایا گیا ایک جنگی ہیلی کاپٹر ماڈل 2020 میں ڈیفنس ایکسپو میں دکھایا گیا تھا، وہ غائب ہوگیا۔

بھارت ایکسپریس۔