CBI Inquiry against Mahua Moitra: ٹی ایم سی ایم پی مہوا موئترا معاملے میں لوک پال نے دیا سی بی آئی جانچ کا حکم- بی جے پی ایم پی نشی کانت دوبے کا دعویٰ

رشوت لے کرپارلیمنٹ میں سوال پوچھنے کے الزام میں ترنمول کانگریس (ٹی ایم سی) رکن پارلیمنٹ مہوا موئترا کی مشکلات میں ہر روز اضافہ ہوتا جا رہا ہے۔ اینٹی کرپشن پینل نے مہوا موئترا کے معاملے کی سی بی آئی جانچ کے احکامات دیئے ہیں۔ بی جے پی رکن پارلیمنٹ نشی کانت دوبے نے یہ دعویٰ کیا ہے۔ انہوں نے ہی مہوا موئترا پر رشوت لے کر پارلیمنٹ میں سوال پوچھنے کا الزام عائد کیا تھا۔ نشی کانت دوبے نے اس معاملے میں وزیر انفارمیشن اینڈ ٹکنا لوجی کو خط بھی لکھا تھا۔

نشی کانت دوبے نے سوشل میڈیا پلیٹ فارم ایکس (ٹوئٹر) پرپوسٹ کیا، “لوکپال نے آج میری شکایت پر ملزم رکن پارلیمنٹ مہوا موئترا کے قومی تحفظ کو گروی رکھ کر بدعنوانی کرنے پرسی بی آئی انکوائری کا حکم دیا۔” نشی کانت دوبے جھارکھنڈ کے گوڈا سے بی جے پی رکن پارلیمنٹ ہیں جبکہ مہوا موئترا مغربی بنگال کے کرشنانگر سے ترنمول کانگریس کی پارلیمنٹ ہیں۔

بی جے پی رکن پارلیمنٹ نشی کانت دوبے نے ہی الزام لگایا تھا کہ مہوا موئترا نے پارلیمانی اکاونٹ کا لاگ ان آئی ڈی اور پاس ورڈ بزنس مین درشن ہیرانندانی کے ساتھ شیئرکیا تھا۔ ہیرا نندانی نے ٹی ایم سی رکن پارلیمنٹ کی طرف سے سوال پوسٹ کئے۔

مہوا موئترا نے تسلیم کیا لاگ ان پاس ورڈ شیئر کرنے کی بات

ٹی ایم سی رکن پارلیمنٹ مہوا موئترا نے پہلے ان الزامات کو غلط بتایا تھا۔ بعد میں ہیرانندانی کے قبول نامہ کے بعد مہوا موئترا نے بھی تسلیم کیا کہ انہوں نے اپنے اکاونٹ کا لاگ ان پاس ورڈ ہیرا نندانی کو شیئرکیا تھا۔ انہوں نے درشن ہیرا نندانی کو اپنا پرانا دوست بتایا ہے۔ حالانکہ مہوا موئترا نے پیسے لے کرسوال پوچھنے کے الزامات کو خارج کیا ہے۔