CareEdge Upgrades Adani Enterprises: کیئر ایج نے اڈانی انٹرپرائزز کی طویل مدتی کریڈٹ ریٹنگ بڑھا کر CARE AA کر دی، آؤٹ لک مستحکم

نئی دہلی : کریڈٹ ریٹنگ ایجنسی کیئر ایج (CareEdge) نے اڈانی انٹرپرائزز لمیٹڈ (اے ای ایل) کی طویل مدتی کریڈٹ ریٹنگ بڑھا کر CARE AA کر دی ہے اور اس کا آؤٹ لک مستحکم رکھا ہے۔ ایجنسی نے کمپنی کی قلیل مدتی ریٹنگ CARE A1+ کو بھی برقرار رکھا ہے۔یہ اڈانی انٹرپرائزز کی جانب سے کیئر ایج سے حاصل کی گئی اب تک کی سب سے بلند ریٹنگ ہے۔ ایجنسی کے مطابق یہ اضافہ کمپنی کی مضبوط ہوتی مالیاتی پوزیشن اور آمدنی کے امکانات میں بہتری کی عکاسی کرتا ہے۔کیئر ایج نے کہا کہ یہ جائزہ اڈانی انٹرپرائزز کے اس کاروباری ماڈل کی آزادانہ توثیق کرتا ہے، جس کے تحت کمپنی ایئرپورٹس، قابل تجدید توانائی، سڑکوں، کان کنی اور بنیادی ڈھانچے جیسے شعبوں میں نئے کاروبار قائم کرکے انہیں ترقی دیتی ہے۔

دس سالہ کاروباری حکمت عملی کے نتائج سامنے آنے لگے

ایجنسی کے مطابق اڈانی انٹرپرائزز کی گزشتہ ایک دہائی پر محیط کاروباری حکمت عملی اب پختگی کی جانب بڑھ رہی ہے۔ کمپنی کے کئی کاروبار سرمایہ کاری اور ابتدائی توسیع کے مرحلے سے نکل کر بہتر آپریٹنگ کیش فلو اور منافع کی سمت بڑھ رہے ہیں۔کیئر ایج نے کمپنی کے نظم و ضبط پر مبنی سرمایہ کاری کے فیصلوں اور مالیاتی انتظام کو بھی اہم قرار دیا۔ ایجنسی نے کہا کہ بڑے پیمانے پر توسیعی منصوبوں کے باوجود کمپنی ایکویٹی سرمایہ جمع کرنے، اسٹریٹجک سرمایہ کاروں کو راغب کرنے اور مالی وسائل تک رسائی برقرار رکھنے کی صلاحیت رکھتی ہے۔یہ ریٹنگ اپ گریڈ جولائی 2026 میں مکمل کیے گئے اڈانی انٹرپرائزز کے 15,000 کروڑ روپے کے کیو آئی پی اور اڈانی ایئرپورٹس ہولڈنگز میں سرمایہ کاروں کی شمولیت سے متعلق ایک معاہدے کے بعد سامنے آیا ہے۔ اس معاہدے میں ایئرپورٹ کاروبار کی پری منی مالیت تقریباً 1.67 لاکھ کروڑ روپے لگائی گئی تھی۔ایجنسی کے مطابق ان اقدامات سے کمپنی کی مالیاتی لچک میں نمایاں بہتری آئی ہے۔

1.33 لاکھ کروڑ روپے کی سرمایہ کاری کا منصوبہ

مضبوط مالیاتی پوزیشن کے باعث اڈانی انٹرپرائزز مالی سال 2027 سے مالی سال 2029 کے دوران مختلف شعبوں میں تقریباً 1.33 لاکھ کروڑ روپے کی سرمایہ کاری کا منصوبہ رکھتی ہے۔اس سرمایہ کاری میں ایئرپورٹس، سڑکوں، پی وی سی، گرین ہائیڈروجن اور دیگر بنیادی ڈھانچے سے متعلق کاروبار شامل ہیں۔کیئر ایج کو توقع ہے کہ مالی سال 2027 سے کمپنی کی آمدنی میں بہتری آئے گی۔ اس میں کچھ کاپر کے پیداواری یونٹ کی توسیع، ایئرپورٹس سے نان ایئرو ناٹیکل آمدنی میں اضافہ، نوی ممبئی انٹرنیشنل ایئرپورٹ کی سرگرمیوں میں توسیع اور سولر ماڈیول و سیل کی پیداواری صلاحیت بڑھا کر 10 گیگاواٹ تک پہنچانے جیسے عوامل اہم کردار ادا کریں گے۔

قانونی اور ضابطہ جاتی خدشات میں کمی

کیئر ایج نے کہا کہ کمپنی سے متعلق قانونی اور ضابطہ جاتی خدشات میں کمی آئی ہے۔ ایجنسی کو توقع ہے کہ امریکہ میں جاری قانونی معاملات کا کمپنی کی مالیاتی لچک یا سرمایہ جاتی اخراجات پر کوئی بڑا براہ راست اثر نہیں پڑے گا۔

مالی نتائج میں بھی بہتری

اڈانی انٹرپرائزز نے مالی سال 2026 میں 1.02 لاکھ کروڑ روپے کی آپریٹنگ آمدنی اور 15,899 کروڑ روپے کا آپریٹنگ منافع درج کیا تھا۔مالی سال 2027 کی پہلی سہ ماہی میں کمپنی کا آپریٹنگ منافع بڑھ کر 5,019 کروڑ روپے ہو گیا، جبکہ گزشتہ سال کی اسی سہ ماہی میں یہ 3,310 کروڑ روپے تھا۔ اس طرح کمپنی کے آپریٹنگ منافع میں نمایاں اضافہ درج کیا گیا۔

بھارت ایکسپر یس اردو