Jammu and Kashmir: جموں و کشمیر میں زائرین سے بھری بس پلٹی، ایک خاتون ہلاک، 24 زخمی

Jammu and Kashmir: اتوارکو جموں و کشمیر کے ریاسی ضلع میں ایک بڑا واقعہ پیش آیا۔ حکام نے بتایا کہ ضلع ریاسی میں ماتا ویشنو دیوی کے درشن کے بعد راجستھان جانے والی بس کے الٹ جانے سے ایک 27 سالہ خاتون ہلاک اور 24 دیگر زخمی ہو گئے۔

ایڈیشنل ڈائرکٹر جنرل آف پولیس (اے ڈی جی پی) جموں زون مکیش سنگھ نے عینی شاہدین کے حوالے سے بتایا کہ حادثہ اس وقت پیش آیا جب ڈرائیور تیز موڑ کی وجہ سے تیز رفتار گاڑی سے کنٹرول کھو بیٹھا۔ انہوں نے بتایا کہ سوشل میڈیا پر کچھ دہشت گرد گروپ اسے دہشت گردی کا واقعہ قرار دے رہے ہیں۔

مندر کا دورہ کرنے کے بعد واپسی

حکام نے بتایا کہ حادثہ کٹرہ کے مضافات میں مری کے قریب دوپہر ایک بجے کے قریب پیش آیا۔ انہوں نے بتایا کہ بس میں خواتین اور بچوں سمیت 30 مسافر سوار تھے۔ سب مندر کا دورہ کر کے واپس آ رہے تھے۔

جے پور کی نیتکا مردہ قرار

حکام نے بتایا کہ حادثے کے فوراً بعد مقامی رضاکاروں اور پولیس کی ٹیم سمیت امدادی کارکن موقع پر پہنچ گئے اور زخمیوں کو کمیونٹی ہیلتھ سینٹر کٹرا لے گئے جہاں جے پور کی نیتکا کو مردہ قرار دیا گیا۔

یہ بھی پڑھیں- Bengaluru: بنگلور میں تیز بارش کی وجہ سے ایک خاتون کی موت، سی ایم سدارمیا نے کیا اظہار افسوس

یہ کوئی دہشت گردی کا واقعہ نہیں

انہوں نے کہا کہ 24 زخمیوں میں سے 11 کو بعد میں خصوصی علاج کے لیے گورنمنٹ میڈیکل کالج اسپتال جموں بھیجا گیا۔ اے ڈی جی پی مکیش سنگھ نے ایک بیان میں کہا، “سوشل میڈیا سائٹس پر کچھ دہشت گرد گروپ اسے دہشت گردی کا واقعہ قرار دے رہے ہیں۔ یہ دہشت گردی کا واقعہ نہیں ہے۔ ڈرائیور اور مسافروں/عینی شاہدین کے بیان کے مطابق، ڈرائیور نے گاڑی کا کنٹرول کھو دیا۔ حادثہ گاڑی کے تیز موڑ اور تیز رفتاری کے باعث پیش آیا۔”

–بھارت ایکسپریس