Bhubaneswar: ہاسٹل سے بی ٹیک کی نیپالی طالبہ کی لاش برآمد ہونے پر کالج کیمپس میں کشیدگی

Bhubaneswar: اڈیشہ کی راجدھانی بھونیشور سے تعلق رکھنے والی انجینئرنگ کی ایک طالبہ نے مشتبہ حالات میں خودکشی کر لی ہے۔ بی ٹیک تھرڈ ایئر کی اس طالبہ کی لاش اس کے کمرے میں پھندے سے لٹکی ہوئی ملی۔ اطلاع ملنے پر پولیس نے موقع پر پہنچ کر لاش کو اپنی تحویل میں لے لیا اور طالبہ کے اہل خانہ کو اطلاع دی۔ لواحقین کے آنے کے بعد لاش کا پوسٹ مارٹم کیا جائے گا۔ اس واقعہ کے بعد کیمپس میں کشیدگی کی صورتحال ہے۔ یہ واقعہ بھونیشور کے کلنگا انسٹی ٹیوٹ آف انڈسٹریل ٹیکنالوجی (KIIT) میں اتوار کو پیش آیا۔

پولیس کے مطابق طالبہ کی شناخت پرکرتی لامسال کے نام سے ہوئی ہے جو کہ اصل میں نیپال سے ہے۔ انفوسٹی پولیس اسٹیشن کو دیے گئے ایک بیان میں KIIT کے رجسٹرار نے کہا کہ وہ ایک ذہین طالبہ تھی اور اس وقت تیسرے سال میں پڑھ رہی تھی۔ دوسری جانب طالبہ کے رشتہ دار نے بتایا کہ اس کی بہن کا ایک طالبہ کے ساتھ افیئر چل رہا تھا۔ یہ ان پٹ ملنے کے بعد پولیس نے طالبہ کے بوائے فرینڈ کو حراست میں لے کر اس سے پوچھ گچھ شروع کردی ہے۔

عاشق پر خودکشی کے لیے اکسانے کا معاملہ

بھونیشور کے ڈی سی پی پناک مشرا کے مطابق طالبہ کے موبائل فون، لیپ ٹاپ اور دیگر گیجٹس کو ضبط کرنے کے بعد تفتیش شروع کر دی گئی ہے۔ ساتھ ہی لڑکی کے بوائے فرینڈ کے خلاف اسے خودکشی پر اکسانے کا مقدمہ درج کر کے اسے گرفتار کر لیا گیا ہے۔ پولیس اس سے پوچھ گچھ کر رہی ہے۔ دوسری جانب کیمپس میں زیر تعلیم نیپالی نژاد دیگر طلبہ نے واقعے کے خلاف احتجاج شروع کردیا ہے۔ ڈی سی پی نے ان تمام طلباء سے امن برقرار رکھنے اور قانون کو اپنے ہاتھ میں نہ لینے کی اپیل کی ہے۔

یہ بھی پڑھیں- Qatar Emir India Visit: ہندوستان کے دورے پر آئے قطر کے امیر، استقبال کے لئے آئی جی آئی ایئرپورٹ پہنچے پی ایم مودی

نیپالی نژاد طلباء سے خالی کروایا گیا ہاسٹل

دوسری جانب پیر کو نیپالی نژاد طلبہ کو کیمپس سے نکال دیا گیا۔ ان طلباء کو دو بسوں میں لاد کر کٹک ریلوے اسٹیشن پر اتارا گیا۔ ان طلباء کا کہنا ہے کہ28 فروری کو ہی ان کے امتحان ہیں۔ اس کے باوجود ان سے ہاسٹل خالی کروا  دیا گیا ہے۔ وہیں دوسری ریاستوں سے یہاں پڑھنے کے لیے آنے والے طلباء نے الزام لگایا کہ انہیں کیمپس سے باہر جانے کی اجازت نہیں دی جارہی ہے۔ اس حوالے سے طلباء اور سیکیورٹی گارڈز کے درمیان ہاتھا پائی کی ویڈیو بھی سوشل میڈیا پر وائرل ہو رہی ہے۔

-بھارت ایکسپریس