Humayun Bhat Killed In Anantnag Encounter: ڈی ایس پی ہمایوں بھٹ کی 2 ماہ کی بیٹی کے سرسے اٹھ گیا سایہ، والد رہے ہیں جموں وکشمیر پولیس میں آئی جی، پڑھیں پوری کہانی

 جموں وکشمیرمیں اننت ناگ ضلع کے کوکیرناگ میں دہشت گردوں کے ساتھ تصادم میں فوج کے ایک کرنل، ایک میجراورجموں وکشمیرپولیس کے ایک ڈپٹی سپرنٹنڈنٹ (ڈی ایس پی) شہید ہوگئے۔ دوجوان لاپتہ ہیں۔ افسران نے بتایا کہ بدھ کی صبح اننت ناگ ضلع کے گارول علاقے میں دہشت گردوں کے ساتھ تصادم میں شہید ہونے والوں میں 19 قومی رائفلس کے کمانڈنگ آفیسر کرنل من پریت سنگھ، میجرآشیش دھونیک اورڈی ایس پی ہمایوں بھٹ ہیں۔ قابل ذکرہے کہ ہمایوں بھٹ کے والد بھی پولیس افسررہے ہیں۔

ہمایوں بھٹ کون ہیں؟

نیوزایجنسی پی ٹی آئی نے افسران کے حوالے سے بتایا کہ شہید ہمایوں بھٹ کی دو ماہ کی بیٹی ہے۔ ہمایوں بھٹ کے والد غلام حسن بھٹ جموں وکشمیر پولیس کے ریٹائرڈ انسپکٹرجنرل (آئی جی) رہے ہیں۔ پولیس ڈپٹی سپرنٹنڈنٹ (ڈی جی پی) دلباغ سنگھ نے جموں وکشمیرپولیس کی طرف سے ہمایوں بھٹ کے شہید ہونے سمیت دیگرجوانوں کی جان جانے پرغم کا اظہارکیا۔ انہوں نے کہا، ”کرنل منپریت سنگھ، میجرآشیش دھونیک اورجموں وکشمیر پولیس کے ریٹائرڈ آئی جی غلام حسن بھٹ کے بیٹے ڈی ایس پی ہمایوں بھٹ کے جانے پربہت مایوس ہوں۔”

دہشت گردوں کے خلاف شروع ہوئی تھی مہم

افسران نے بتایا کہ گارول علاقے میں دہشت گردوں کے خلاف مہم منگل کی شام شروع ہوئی تھی، لیکن رات میں اسے روک دیا گیا تھا۔ افسران نے بتایا کہ ایک ٹھکانے پر دہشت گردوں کو دیکھے جانے کی اطلاع کے بعد آج صبح پھران کی (دہشت گردوں) تلاش شروع کی گئی۔ اپنی ٹیم کی قیادت کرتے ہوئے کرنل من پریت سنگھ نے دہشت گردوں پرحملہ بولا۔ حالانکہ دہشت گردوں کی گولی باری میں وہ شدید طورپرزخمی ہوگئے۔ 12ویں سکھ لائٹ انفینٹری (ایل آئی) کے کرنل من پریت سنگھ کو فوج میڈل سے بھی سرفرازکیا گیا تھا۔ دھونیک 15ویں سکھ ایل آئی سے تھے۔ افسران نے بتایا کہ دھونیک اورہمایوں بھٹ کو بھی گولیاں لگیں، جس سے وہ شدید طور پرزخمی ہوگئے۔ یہ حملہ ایسے وقت میں ہوا جب ایک دن پہلے ہی جموں علاقے کے راجوری میں ایک تصادم میں فوج کا ایک جوان شہید ہوگیا تھا جبکہ فوج کی 6 سالہ مادا لیبرا ڈور بھی اپنے’ہینڈلر‘ کو بچانے کے دوران جان گنوا بیٹھی تھی۔