Amit Shah hoists the tricolour at his residence: وزیر داخلہ امت شاہ نے ’ہر گھر ترنگا‘ مہم کے تحت اپنی رہائش گاہ پر ترنگا لہرایا — عوام سے ملک گیر شرکت کی اپیل

نئی دہلی— مرکزی وزیرداخلہ امت شاہ نے پیر کے روز ’ہر گھر ترنگا‘ مہم کے تحت اپنی رہائش گاہ پر قومی پرچم لہرایا اور عوام سے اپیل کی کہ وہ بڑے پیمانے پر اس تحریک میں شامل ہو کر یومِ آزادی کے موقع پر اپنے گھروں پر ترنگا لہرائیں۔ امت شاہ نے ایک بیان میں کہا کہ وزیراعظم نریندر مودی کی قیادت میں شروع ہونے والا یہ مہم آج ایک عظیم عوامی مہم بن چکا ہے جو ملک کے 140 کروڑ شہریوں کو ایک رشتے میں باندھ رہا ہے اور قوم پرستی کے جذبے کو مزید مضبوط کر رہا ہے۔

’ترنگا ہماری پہچان اور فخر‘

امت شاہ نے کہا: ’’ترنگا ہمارا فخر ہے، ہماری شناخت ہے، اور وہ سب کچھ ہے جس کے لیے بھارت بطور ایک متحد قوم کھڑا ہے۔‘‘ انہوں نے اپنے رہائشی احاطے میں پرچم کشائی کے بعد عوام سے اپیل کی کہ وہ اس تحریک میں شریک ہوں، اپنے گھروں پر ترنگا لہرائیں اور اپنی تصویریں harghartiranga.com  پر شیئر کریں۔

’ہر گھر ترنگا‘ مہم کیا ہے؟

’ہر گھر ترنگا‘ مہم آزادی کا امرت مہوتسو کے تحت 2022 میں وزیراعظم نریندر مودی کی اپیل پر شروع ہوئی۔ اس کا مقصد عوام میں قومی پرچم کے تئیں احترام، وابستگی اور فخر کے جذبے کو فروغ دینا ہے۔ اس مہم میں شہریوں کو یومِ آزادی کے موقع پر اپنے گھروں، دفاتر، تعلیمی اداروں اور دیگر مقامات پر ترنگا لہرانے کی ترغیب دی جاتی ہے۔ حکومت نے اس مہم کو ملک گیر بنانے کے لیے خصوصی مہم، سوشل میڈیا مہم، اور آن لائن پلیٹ فارم فراہم کیے ہیں، جہاں لوگ اپنی شرکت کو ریکارڈ کر سکتے ہیں۔

آزادی کے دیوانوں کی یاد میں

وزیر داخلہ نے کہا کہ یہ مہم اُن لاتعداد آزادی کے متوالوں کی قربانیوں کی یاد دلاتی ہے جنہوں نے اپنے خون، پسینے اور جان کی قربانی دے کر آزاد بھارت کا خواب پورا کیا۔ آج کے بھارت میں یہ عزم ہے کہ اس خواب کو نہ صرف محفوظ رکھا جائے بلکہ ملک کو دنیا کا بہترین ملک بنانے کے لیے محنت کی جائے۔

بھارت ایکسپریس اردو۔