Pradhan Mantri Mudra Yojana: چھوٹے کاروباریوں کے لیے امید کی نئی کرن، امت شاہ نے بتایا کیسے ’پی ایم مدرا یوجنا‘ نے کروڑوں بھارتیوں کی بدلی تقدیر

نئی دہلی :مرکزی وزیر داخلہ امت شاہ نے پردھان منتری مدرا یوجنا کے 11 سال مکمل ہونے پر اس کی کامیابیوں کو تاریخی قرار دیتے ہوئے کہا کہ اس اسکیم نے ملک میں ناری شکتی اور نوجوان بھارت کو نئی طاقت دی ہے۔8 اپریل 2015 کو پردھان منتری مدرا یوجنا کا آغاز کیا گیا تھا۔ اس موقع پر امت شاہ نے سوشل میڈیا پلیٹ فارم ’ایکس‘ پر پوسٹ کرتے ہوئے کہا کہ گزشتہ 11 برسوں میں مدرا یوجنا نے چھوٹے کاروباریوں اور اسٹارٹ اپس کو بغیر گارنٹی قرض فراہم کر کے خود روزگار اور چھوٹی صنعتوں کو نئی توانائی دی ہے۔

امت شاہ نے بتایا کہ ان 11 برسوں میں اس فلاحی اسکیم کے تحت 40 لاکھ کروڑ روپے سے زیادہ کے 58 کروڑ قرض تقسیم کیے جا چکے ہیں۔ اس کے نتیجے میں 12 کروڑ سے زائد نوجوان مستفید ہوئے ہیں اور خود انحصار بھارت کی تعمیر کو نئی رفتار ملی ہے۔امت شاہ کے مطابق اس اسکیم کی سب سے بڑی کامیابی خواتین کو ملا فائدہ ہے۔ امت شاہ نے کہا کہ ہر تین میں سے دو مدرا قرض خواتین کو دیے گئے، جو خواتین کے خود مختار ہونے کی سمت میں ایک تاریخی کامیابی ہے۔

بغیر گارنٹی قرض کی سہولت

مدرا یوجنا سے پہلے چھوٹے کاروبار شروع کرنا آسان نہیں تھا۔ بینک سے قرض لینے کے لیے گارنٹی اور پیچیدہ کاغذی کارروائی بڑی رکاوٹ بنتی تھی، جس کی وجہ سے کئی نوجوانوں کے خواب ادھورے رہ جاتے تھے۔ لیکن اس اسکیم نے اس مشکل کو آسان بنا دیا اور نوجوانوں کے اعتماد کو مضبوط کیا۔

ناری شکتی اور نوجوان بھارت کو نئی اڑان

اس اسکیم کے ذریعے گاؤں اور چھوٹے شہروں کی خواتین بھی خود روزگار کی طرف بڑھ رہی ہیں۔ وہ نہ صرف اپنے خاندان کی معیشت کو مضبوط بنا رہی ہیں بلکہ مقامی سطح پر روزگار کے نئے مواقع بھی پیدا کر رہی ہیں۔40 لاکھ کروڑ روپے سے زائد رقم کے بازار میں آنے سے معیشت کو بھی تقویت ملی ہے۔ اس سے لاکھوں نئے کاروبار شروع ہوئے اور 12 کروڑ نوجوان خود انحصار بن کر دوسروں کو روزگار دینے کے قابل ہوئے ہیں۔ مدرا یوجنا کو نریندر مودی حکومت کی اہم اسکیموں میں شمار کیا جاتا ہے، جس نے چھوٹے کاروباریوں کو بڑی امید دی ہے اور ملک میں خود روزگار کے کلچر کو فروغ دیا ہے۔

بھارت ایکسپریس اردو