Amit Shah criticizes opposition in Sitamarhi: سیتامڑھی میں اپوزیشن پر برسے وزیر داخلہ امت شاہ، کہا-لالو اینڈ کمپنی ملک کی سلامتی پر اٹھا رہی ہے سوال

مرکزی وزیر داخلہ امت شاہ نے جمعے کے روز بہار کے ضلع سیتامڑھی میں ایک عوامی جلسے سے خطاب کرتے ہوئے اپوزیشن پر سخت تنقید کی۔ انھوں نے کہا کہ کانگریس اور راشٹریہ جنتا دل (آر جے ڈی) ’’آپریشن سندور‘‘ کی مخالفت کرکے ملک کی سلامتی پر سوال اٹھا رہے ہیں۔ بہار کے پنورا دھام میں جانکی ماتا مندر کی از سرِ نو تعمیر کا سنگِ بنیاد رکھنے کے بعد عوام سے خطاب کرتے ہوئے وزیر داخلہ امت شاہ نے کہا کہ ’’کانگریس پارٹی اور لالو، لالو اینڈ کمپنی پارلیمنٹ میں آپریشن سندور کی مخالفت کر رہی ہے۔ میں پوچھنا چاہتا ہوں، کیا ہمیں دہشت گردوں کو جواب نہیں دینا چاہیے؟ کیا ہمیں آپریشن سندور نہیں کرنا چاہیے تھا؟ لالو اینڈ کمپنی کو معلوم نہیں کہ یہ نریندر مودی کی حکومت ہے، این ڈی اے کی حکومت ہے۔ کسی کو بھی ملک کی سلامتی سے کھیلنے کا حق نہیں ہے۔‘‘

اپنے خطاب میں امت شاہ نے آر جے ڈی لیڈر تیجسوی یادو اور ان کے خاندان کو نشانے پر لیتے ہوئے متھلانچل کے علاقے میں ترقیاتی کاموں کے فقدان پر بھی سوال اٹھایا۔ انھوں نے کہا کہ ’’میں تیجسوی یادو سے پوچھنا چاہتا ہوں، ان کے والد اور والدہ طویل عرصے تک اقتدار میں رہے۔ غنڈہ گردی، گینگ چلانے، اغوا اور تاوان مانگنے کے علاوہ آپ نے متھلانچل کی ترقی کے لیے کیا کیا؟‘‘

دریں اثنا امت شاہ نے جانکی ماتا مندر کی ازسرِ نو تعمیر کے سنگ بنیاد رکھنے پر ریاست کے عوام اور رام بھکتوں کو مبارکباد بھی دی۔ انھوں نے کہا کہ ’’میں بھگوان رام اور جانکی ماتا کے عقیدت مندوں کو مبارکباد دیتا ہوں کہ پُنورا دھام میں جانکی ماتا مندر کی از سرِ نو تعمیر کا سنگ بنیاد رکھا گیا ہے۔‘‘ اس تقریب میں بہار کے وزیر اعلیٰ نتیش کمار اور نائب وزیر اعلیٰ سمراٹ چودھری بھی شریک ہوئے۔

بھارت ایکسپریس اردو