AIMIM breaks alliance with Humayun Kabir: اے آئی ایم آئی ایم نے مغربی بنگال میں ہمایوں کبیر سے توڑا اتحاد، اسدالدین اویسی کی پارٹی نے کیا اکیلے لڑنے کا اعلان

اسدالدین اویسی کی پارٹی اے آئی ایم آئی ایم نے ہمایوں کبیر کی پارٹی سے اتحاد ختم کرلیا ہے۔

مغربی بنگال میں اسمبلی الیکشن کے دوران وائرل ایک ویڈیو کے بعد سیاسی ہلچل تیزہوگئی ہے۔ یہ ویڈیوہمایوں کبیرسے جڑا ہوا ہے۔ ترنمول کانگریس (ٹی ایم سی) نے انفورسمنٹ ڈائریکٹوریٹ (ای ڈی) سے ویڈیوکی جانچ کرانے اورکارروائی کرنے کا مطالبہ کیا ہے۔ تووہیں ریاست میں ہمایوں کبیر کی پارٹی اے جے یوپی کے ساتھ مل کرالیکشن لڑرہی اسدالدین اویسی کی پارٹی آل انڈیا مجلس اتحاد المسلمین (اے آئی ایم آئی ایم) نے اپنا سیاسی اتحاد ختم کرنے کا اعلان کیا ہے۔

اسدالدین اویسی کی پارٹی اے آئی ایم آئی ایم نے آج جمعہ کی صبح سوشل میڈیا ایکس پرپوسٹ کرکے کہا، ”ہمایوں کبیر سے متعلق انکشاف سے یہ واضح ہوگیا ہے کہ بنگال کے مسلمانوں کتنے کمزورہیں۔ اے آئی ایم آئی ایم ایسے کسی بھی بیان سے خود کو نہیں جوڑسکتی، جس سے مسلمانوں کی ایمانداری پرسوال اٹھے۔“ پارٹی نے مزید کہا، ”آج سے اے آئی ایم آئی ایم نے ہمایوں کبیر کی پارٹی اے جے یوپی کے ساتھ اپنا اتحاد توڑدیا ہے۔“

کسی بھی پارٹی سے اتحاد نہیں کریں گے: اے آئی ایم آئی ایم

اے آئی ایم آئی ایم نے مزید لکھا، ”بنگال میں مسلمان سب سے غریب، سب سے زیادہ نظراندازاورسب سے زیادہ استحصال زدہ طبقے میں سے ایک ہیں۔ کئی دہائیوں کی سیکولرحکمرانی کے باوجود، ان کے لئے کچھ نہیں کیا گیا ہے۔ کسی بھی ریاست میں الیکشن لڑنے کے پیچھے اے آئی ایم آئی ایم کی پالیسی اس بات کویقینی بنانا ہے کہ پسماندہ طبقات کوایک آزاد سیاسی آوازملے۔ ہم اب بنگال میں کسی بھی پارٹی کے ساتھ آزادانہ طورپرالیکشن لڑیں گے۔“

اس سے قبل جمعرات کے روز (9 اپریل، 2026) مغربی بنگال میں اس وقت سیاسی تنازعہ کھڑا ہوگیا، جب ہمایوں کبیرکا ایک مبینہ ویڈیوسوشل میڈیا پروائرل ہوا۔ ویڈیوکے جاری ہونے کے بعد، ممتا بنرجی کی ترنمول کانگریس پارٹی نے اسے شیئرکیا اورانفورسمنٹ ڈائریکٹوریٹ (ای ڈی) سے ہمایوں کبیرکے مبینہ دعووں کی تحقیقات کرنے کا مطالبہ کیا۔

یہ اے آئی جنریٹیڈ ویڈیو ہے، ہمایوں کبیرکا دعویٰ

حالانکہ ویڈیو وائرل ہونے کے بعد ہمایوں کبیرنے اس ویڈیوکو اے آئی جنریٹیڈ قراردیتے ہوئے کہا کہ اس کا مقصد انہیں بدنام کرنا ہے۔ انہوں نے اس معاملے میں قانونی کارروائی کرنے کی بھی دھمکی دی۔ مغربی بنگال کے ایک سرکردہ مسلم رہنما ہمایوں کبیربابری مسجد کا سنگ بنیاد رکھے جانے کے اعلان کے بعد سرخیوں میں آئے تھے۔ حالانکہ انہیں مسلمانوں کے ایک بڑے طبقے کی ناراضگی کا بھی سامنا کرنا پڑا تھا، جس کے بعد انہیں ٹی ایم سی نے معطل کردیا تھا۔ گزشتہ سال کے آخرمیں ٹی ایم سی سے معطل ہونے کے کچھ ہی دن بعد عام جنتا اُنین پارٹی (اے جے یوپی) تشکیل دی۔ اسمبلی الیکشن کے اعلان کے بعد ہمایوں کبیرنے اسدالدین اویسی کی پارٹی (اے آئی ایم آئی ایم) کے ساتھ انتخابی اتحاد بنایا تھا، جواب ٹوٹ گیا ہے۔