Aap leader sanjay singh: عام آدمی پارٹی کے لیڈر سنجے سنگھ کی ممبئی پولیس سے شکایت،کہا میرے خلاف بہت بڑا فراڈ ہورہا ہے

عام آدمی پارٹی کے راجیہ سبھا کے رکن سنجے سنگھ نے ممبئی اور مدھیہ پردیش پولیس سے شکایت کی ہے۔ سنجے سنگھ نے ٹویٹ کیا کہ ‘میرے نام پر بہت بڑا فراڈ ہو رہا ہے۔ پہلے مدھیہ پردیش کی صدر رانی اگروال جی کا فون آیا اور ان سے رقم کا مطالبہ کیا گیا۔ آج ممبئی کی صدر پریتی موہن جی کا فون آیا۔ یہ کیسے ہو رہا ہے؟ ممبئی پولیس اور مدھیہ پردیش  پولیس کو اس کا نوٹس لینا چاہئے اور کارروائی کرنی چاہئے۔

اس سے پہلے سنجے سنگھ نے یہ الزام لگایا تھا

اس سے قبل عام آدمی پارٹی کے لیڈر سنجے سنگھ نے مرکزی تفتیشی ایجنسی سی بی آئی اور ای ڈی پر بڑا الزام لگایا تھا۔ رکن پارلیمنٹ سنجے سنگھ نے کہا کہ دونوں ایجنسیوں کے اہلکار دہلی ایکسائز پالیسی کے معاملے میں گواہوں کو بیان دینے کی دھمکی دے رہے ہیں۔ سنجے سنگھ نے یہ بھی دعویٰ کیا کہ ان کے پاس اس بات کے ثبوت ہیں کہ پارٹی اور اس کے قومی کنوینر اروند کیجریوال کے خلاف یہ سازش کس طرح رچی جارہی ہے۔

‘کجریوال کو تباہ کرنے کی سازش’

دوسری طرف راجیہ سبھا کے رکن سنجے سنگھ نے الزام لگایا کہ ای ڈی اور سی بی آئی اس معاملے میں بندوق کی نوک پر بیان لے رہے ہیں۔ رکن پارلیمنٹ نے کہا کہ ای ڈی اور سی بی آئی میں دو یا تین افسران ہیں جو وزیر اعظم نریندر مودی کی ہدایت پر کام کر رہے ہیں۔ میں ان سے کہنا چاہتا ہوں کہ وہ اپنا کام ایمانداری سے کریں۔ سنجے سنگھ نے دعویٰ کیا کہ عام آدمی پارٹی اور کیجریوال کو تباہ کرنے کی سازش رچی جارہی ہے۔