MP Sanjay Singh gets bail from Supreme Court: عام آدمی پارٹی کو بڑی راحت، راجیہ سبھا رکن پارلیمنٹ سنجے سنگھ کو سپریم کورٹ میں ملی ضمانت

عام آدمی پارٹی کے راجیہ سبھا رکن پارلیمنٹ سنجے سنگھ کو بڑی راحت ملی ہے۔ سپریم کورٹ نے انہیں آج ضمانت دے دی ہے۔ 6 ماہ سے جیل میں بند سنجے سنگھ کو سپریم کورٹ نے ضمانت دے دی ہے۔ اب سنجے سنگھ جیل سے باہرآسکتے ہیں۔ دراصل، شراب پالیسی سے متعلق منی لانڈرنگ معاملے میں انہیں عدالت عظمیٰ سے راحت ملی ہے۔ سنجے سنگھ کی ضمانت سے عام آدمی پارٹی کے لئے بڑی راحت کی بات ہے۔ کیونکہ اب اسی بنیاد پر سابق نائب وزیراعلیٰ منیش سسودیا یا دہلی کے وزیراعلیٰ اروند کیجریوال اپیل کرسکتے ہیں۔

سپریم کورٹ نے کہا کہ ضمانت کی شرائط ٹرائل کورٹ طے کرے۔ عدالت نے کہا کہ سنجے سنگھ اپنی سیاسی سرگرمیوں میں حصہ لے سکتے ہیں۔ ٹرائل پورا ہونے تک وہ ضمانت پررہیں۔ انفورسمنٹ ڈائریکٹوریٹ (ای ڈی) نے کہا کہ انہیں ضمانت دینے پرکوئی اعتراض نہیں ہے۔ سنجے سنگھ کو گزشتہ سال 4 اکتوبر 2023 کو مبینہ شراب گھوٹالہ معاملے میں گرفتارکیا گیا تھا۔