Iran-Israel Tension: مغربی ایشیا میں بحران کے بادل ؟ امریکی وزیر خارجہ نے ترکی، سعودی، مصر اور اردن سے بات کی

امریکی وزیر خارجہ انٹونی بلنکن نے اتوار کے روز اردن، سعودی عرب، ترکی اور مصر کے اپنے ہم منصبوں سے بات کی، ایران کے اسرائیل پر حملوں کے بعد مغربی ایشیا میں بحران پیدا ہونے کے خدشے کے درمیان انہوں متعدد ممالک کے عہدیداروں سے بات کی ہے  ۔

ایران نے اسرائیل پر 300 سے زائد ڈرون اور میزائل فائر کیے جنہیں اسرائیل، امریکی اور اس کی اتحادی افواج نے ہدف تک پہنچنے سے پہلے ہی فضا میں مار گرایا۔ ایران نے ڈرون اور میزائل حملوں کو یکم اپریل کو شام میں اپنے قونصل خانے پر حملے کا ردعمل قرار دیا ہے۔

امریکی صدر جو بائیڈن کی جی 7 ممالک کے رہنماؤں کے ساتھ بات چیت کے بعد اس بحران سے نمٹنے میں سفارتی رفتار آئی ہے۔ جو بائیڈن نے اردن کے شاہ عبداللہ اور اسرائیلی وزیراعظم بنجمن نیتن یاہو سے بھی فون پر الگ الگ بات کی۔

ان بات چیت میں امریکی قیادت نے خطے میں کشیدگی کو مزید بڑھنے سے روکنے کی ضرورت پر زور دیا اور اسرائیل کے دفاع کے لیے امریکہ کے غیر متزلزل عزم کا اعادہ کیا۔

محکمہ خارجہ کے ترجمان میتھیو ملر نے کہا کہ رہنماؤں نے غزہ کے بحران کا مستقل حل تلاش کرنے کے لیے سفارتی کوششوں کی اہمیت پر بھی زور دیا جو اسرائیل اور فلسطین کے لیے دیرپا امن اور سلامتی فراہم کرتا ہے۔ دریں اثنا، جو بائیڈن نے اپنے دور حکومت کے سب سے بڑے خارجہ پالیسی بحران پر کانگریس کے رہنماؤں سے بات کی۔

13 اپریل کو ایران نے اسرائیل پر 300 سے زیادہ قاتل ڈرون، بیلسٹک میزائل اور کروز ڈرون فائر کیے تھے۔ تاہم اسرائیلی فوج آئی ڈی ایف  کا کہنا ہے کہ 99 فیصد میزائلوں کو مار گرایا گیا جس میں امریکہ، برطانیہ، فرانس اور اردن نے بھی اس کی مدد کی۔ اس حملے کو شام کے دارالحکومت دمشق میں ایرانی سفارت خانے پر حملے کے بدلے کے طور پر دیکھا جا رہا ہے۔ اس مہینے کے آغاز میں وہاں حملے کیے گئے تھے، جن کے پیچھے اسرائیل کا ہاتھ سمجھا جاتا ہے۔ تاہم اسرائیل نے اسے قبول نہیں کیا۔