Tokyo Shopping Complex Incident: ٹوکیو کے گنزا شاپنگ مال میں نامعلوم اسپرے کے چھڑکاؤ سے افراتفری، 20 افراد کی طبیعت خراب، اسپتال میں کرایا گیا داخل

ٹوکیو: جاپان کے دارالحکومت ٹوکیو کے مشہور گنزا علاقے میں واقع ایک بڑے شاپنگ کمپلیکس میں پیر کے روز اس وقت خوف و ہراس پھیل گیا جب ایک نامعلوم شخص نے مبینہ طور پر کوئی تیز اسپرے چھڑک دیا، جس کے بعد وہاں موجود متعدد افراد کی طبیعت اچانک خراب ہونے لگی۔ واقعے کے نتیجے میں کم از کم 20 افراد نے سانس لینے میں دشواری، کھانسی اور گلے میں جلن کی شکایت کی جبکہ ایک شخص کو تشویشناک حالت میں اسپتال منتقل کرنا پڑا۔ اطلاعات کے مطابق یہ واقعہ گِنزا سکس نامی شاپنگ کمپلیکس میں پیش آیا، جہاں خریداری کے لیے بڑی تعداد میں لوگ موجود تھے۔ ایک خاتون نے ایمرجنسی سروس کو فون کر کے اطلاع دی کہ عمارت کے اندر اچانک ایک تیز اور ناگوار بو پھیل گئی، جس کے باعث لوگ مسلسل کھانسنے لگے اور کئی افراد گھبراہٹ کا شکار ہو گئے۔

جاپانی خبر رساں ادارے ’’کیوڈو نیوز‘‘ کے مطابق پولیس نے شاپنگ کمپلیکس میں نصب سی سی ٹی وی کیمروں کی فوٹیج کا جائزہ لیا، جس میں ایک شخص کو عمارت کے اندر کوئی نامعلوم مادہ اسپرے کرتے ہوئے دیکھا گیا۔ واقعے کے فوراً بعد ملزم موقع سے فرار ہو گیا جبکہ پولیس نے اس کی تلاش شروع کر دی ہے۔ واقعے کے وقت مال میں موجود ایک خاتون نے میڈیا کو بتایا کہ اس نے کئی لوگوں کو اپنے چہرے اور منہ ڈھانپتے ہوئے پریشانی کی حالت میں دیکھا۔ اس کے مطابق واقعے کے کئی گھنٹے بعد بھی اس کے گلے میں سن ہونے اور درد کی کیفیت برقرار تھی۔ امدادی ٹیموں نے فوری طور پر متاثرہ افراد کو ابتدائی طبی امداد فراہم کی جبکہ بعض افراد کو مزید معائنے کے لیے اسپتال منتقل کیا گیا۔

پولیس اور فائر بریگیڈ حکام نے احتیاطی طور پر شاپنگ کمپلیکس کے بعض حصوں کو عارضی طور پر خالی کرا لیا تاکہ صورتحال پر قابو پایا جا سکے۔ حکام اس بات کی تحقیقات کر رہے ہیں کہ استعمال کیا جانے والا اسپرے کس نوعیت کا تھا اور آیا یہ حملہ دانستہ طور پر کیا گیا یا نہیں۔ دریں اثنا، ٹوکیو میں اس نوعیت کے واقعات نے عوامی مقامات پر سکیورٹی کے حوالے سے تشویش میں اضافہ کر دیا ہے۔ چند ہفتے قبل 29 اپریل کو بھی ٹوکیو کے فوسا علاقے میں ایک شخص نے مبینہ طور پر دو ہائی اسکول طلبہ پر ہتھوڑے سے حملہ کیا تھا اور بعد میں پولیس اہلکاروں پر بھی ایک نامعلوم مادہ اسپرے کر دیا تھا۔

پولیس کے مطابق اس واقعے کی ابتدا اس وقت ہوئی جب حملہ آور کی والدہ نے سڑک کنارے باتیں کرنے والے طلبہ کو خاموش رہنے کو کہا، تاہم انکار پر جھگڑا شدت اختیار کر گیا۔ بعد میں ملزم نے پولیس کو چاقو دکھا کر دھمکایا اور ان پر بھی اسپرے کر دیا، جس سے تین اہلکار زخمی ہو گئے تھے۔ حکام کا کہنا ہے کہ حالیہ واقعات کے بعد ٹوکیو میں عوامی مقامات اور شاپنگ مراکز کی نگرانی مزید سخت کی جا رہی ہے تاکہ شہریوں کے تحفظ کو یقینی بنایا جا سکے اور ایسے واقعات کی بروقت روک تھام ممکن ہو۔

بھارت ایکسپریس اردو۔