Israel-Hamas war: جنگ بندی میں توسیع کی کوششوں کے بیچ غزہ پٹی پہنچے نیتن یاہو، کہا:آخری دم تک جاری رہےگی جنگ، اسرائیل کو کوئی نہیں روک سکتا

مزاحمت پسند تنظیم حماس کے ساتھ جاری جنگ بندی کے درمیان اسرائیلی وزیراعظم بنجمن نیتن یاہو نے شمالی غزہ کی پٹی پہنچ کر فوجیوں سے ملاقات کی اور کہا کہ جنگ آخری دم تک جاری رہے گی، اسرائیل کو کوئی نہیں روک سکتا۔نیتن یاہو نے اپنے دفتر کی طرف سے جاری کردہ ایک ویڈیو میں کہا کہ “ہم اپنے یرغمالیوں کو واپس لانے کی ہر ممکن کوشش کر رہے ہیں اور آخر کار ہم ان سب کو واپس لائیں گے۔ٹائمز آف اسرائیل کی رپورٹ کے مطابق پی ایم نیتن یاہو نے کہا کہ اس جنگ میں ہمارے تین اہداف ہیں – حماس کو ختم کرنا، اپنے تمام یرغمالیوں کو واپس لانا اور اس بات کو یقینی بنانا کہ غزہ دوبارہ اسرائیل کے لیے خطرہ نہ بنے۔

پی ایم نیتن یاہو نے کہا کہ ہم فتح حاصل کرنے تک لڑائی کو جاری رکھیں گے۔ ہمیں کوئی نہیں روک سکتا اور ہمیں یقین ہے کہ ہمارے پاس جنگ کے تمام اہداف حاصل کرنے کی طاقت، قوت، ارادہ اور عزم ہے اور ہم ایسا کریں گے۔وزیر اعظم کے دفتر کے مطابق، وزیر اعظم نیتن یاہو نے اسرائیلی فوجیوں کی جانب سے دریافت کی گئی حماس کی سرنگوں میں سے ایک کا دورہ کیا۔ اس دورے کے دوران، وزیر اعظم کے ساتھ ان کے چیف آف اسٹاف زاچی بریورمین، قومی سلامتی کے مشیر زاچی ہنیگبی، ان کے ملٹری سیکریٹری میجر جنرل ایوی گل اور ڈپٹی آئی ڈی ایف چیف آف اسٹاف میجر جنرل امیر بارم بھی تھے۔

وہیں دوسری جانب مصر کی وزارت خارجہ کا کہنا ہے کہ مصری وزیر خارجہ سامح شکری کو امریکی وزیر خارجہ انٹونی بلنکن کا فون آیا ہے کہ وہ حماس کے ساتھ اسرائیل کی جنگ بندی کو خطرے میں ڈالنے والی رکاوٹوں اور جامع جنگ بندی تک پہنچنے کے طریقوں پر تبادلہ خیال کریں۔ وزارت نے ایک بیان میں کہا، فون کال کے دوران، شکری نے 15 نومبر کو جاری کردہ اقوام متحدہ کی سلامتی کونسل کی قرارداد پر عمل درآمد کرتے ہوئے جنگ بندی کی ضرورت پر زور دیا جس میں انسانی ہمدردی کی بنیاد پر توقف کا مطالبہ کیا گیا ہے جو غزہ میں امداد کی اجازت دے سکتی ہے۔وہیں اس جنگ بندی میں توسیع کے بارے میں بات چیت کی جارہی ہے تاکہ مزید یرغمالیوں کو رہائی مل سکے۔

بھارت ایکسپریس۔