Iraq, Saudi Arabia, UAE condemn Israel’s Golan Heights plans: گولان کی پہاڑیوں پر آبادی دوگُنی کرنے کے اسرائیلی فیصلے سے مسلم ممالک چراغ پا،سعودی بھی خفا

اسرائیلی حکومت نے شام میں بشار الاسد کی حکومت کے خاتمے کے بعد مقبوضہ اور الحاق شدہ گولان کی پہاڑیوں پر آباد شہریوں کی تعداد کو دوگنا کرنے کے منصوبے کی منظوری دے دی ہے۔غیر ملکی خبر رساں ادارے اے ایف پی کی خبر کے مطابق اس منصوبے کی منظوری کے حوالے سے وزیراعظم کے دفتر نے بتایاہے۔وہیں مسلم ورلڈ لیگ نے اسرائیلی حکومت کی جانب سے ملحقہ گولان کی پہاڑیوں کی آبادی کو دو گنا کرنے کے فیصلے کی مذمت کی ہے۔بھارت ایکسپریس کی  رپورٹ کے مطابق مسلم ورلڈ لیگ کی جانب سے اتوار کو جاری کیے گئے بیان میں عالمی برادری پر زور دیا گیا ہے کہ وہ اسرائیل کے جارحانہ اقدامات کی مذمت کرے اور اس کے خلاف ایکشن لے۔ ایسے اقدامات شام کے عوام کے لیے برسوں تک مصائب اور ناانصافیوں میں گھرے رہنے کے بعد سلامتی و استحکام کی بحالی کے امکانات کو سبوتاژ کر رہے ہیں۔

اسرائیلی وزیراعظم بنجمن نیتن یاہو کے آفس نے کہا تھا کہ حکومت نے ’متفقہ طور پر‘ گولان کی پہاڑیوں میں آبادی کی شرح کو دو گنا کرنے کے لیے ایک کروڑ 10لاکھ ڈالر کی منظوری دی ہے۔ادھرمسلم ورلڈ لیگ نے بیان میں زور دیتے ہوئے کہا ہے کہ ’شام کی خودمختاری کا احترام، علاقائی سالمیت اور شہریوں کی حفاظت‘ ضروری ہے۔گولان میں 24 ہزار دروز رہائش پذیر ہیں، جو ایک عرب اقلیت ہے اور ان میں زیادہ تر شامی شناخت رکھتے ہیں۔اسرائیل 1967 سے گولان کی پہاڑیوں کے زیادہ تر علاقے پر قابض ہے اور 1981 میں اس کو اپنے ساتھ ملایا اور یہ ایک ایسا اقدام تھا جس کو صرف امریکہ نے تسلیم کیا تھا۔

ادھر دوسری جانب سعودی وزارت خارجہ نے سعودی عرب کی طرف سے مقبوضہ گولان میں آبادکاری کو وسعت دینے کے اسرائیلی قابض حکومت کے فیصلے کی شدید مذمت کی ہے۔ سعودی عرب نے شام کی سلامتی اور استحکام کو دوبارہ حاصل کرنے کے امکانات کو مسلسل سبوتاژ کرنے کے اسرائیلی اقدامات کی بھی مذمت کی۔اپنے ایک بیان میں سعودی وزارت خارجہ نے کہا کہ مملکت سعودی عرب نے بین الاقوامی برادری سے حالیہ اسرائیلی خلاف ورزیوں کی مذمت کرنے کے لیے اپنی اپیل کی تجدید کی ہے۔ سعودی عرب نے شام کی خودمختاری اور علاقائی سالمیت کا احترام کرنے کی ضرورت پر زور دیا اور کہا کہ گولان شام کا عرب مقبوضہ علاقہ ہے۔

بھارت ایکسپریس۔