Growing india Egypt ties will open doors: بھارت اور مصر کے بڑھتے ہوئے تعلقات سے دونوں ممالک کے درمیان الیکٹرک وہیکلز، قابلِ تجدید توانائی اور فِن ٹیک کے شعبوں میں تعاون کے کھلیں گے دروازے

ایک تازہ ترین رپورٹ کے مطابق، بھارت اور مصر کے درمیان اسٹریٹجک مذاکرات الیکٹرک گاڑیوں، خوراکی تحفظ، دفاع، ٹیکنالوجی اور اسٹارٹ اپس کے شعبوں میں تعاون کے وسیع امکانات کے تحت دو طرفہ شراکت داری کو فروغ دیں گے۔ جواہر لعل نہرو یونیورسٹی (جے این یو) کے ویسٹ ایشین اسٹڈیز کے ایسوسی ایٹ پروفیسر مدثر قمر کا حوالہ دیتے ہوئے عرب نیوز نے اپنی رپورٹ میں کہا ہے کہ دونوں ممالک کے درمیان اسٹارٹ اپس، قابلِ تجدید توانائی، مصنوعی ذہانت (AI)، فِن ٹیک، الیکٹرک وہیکلز، خوراکی تحفظ جیسے ابھرتے ہوئے اور مخصوص شعبوں میں تعلقات کو بہتر بنانے کی زبردست گنجائش موجود ہے۔رپورٹ میں بتایا گیا ہے کہ سرمایہ کاری، توانائی اور دفاعی تعاون سب سے اہم شعبے ہیں۔ مصر خاص طور پر سویج کینال اکنامک زون کے ذریعے مقامی منڈی کی ضروریات کو پورا کرنے اور برآمدات کو وسعت دینے کے لیے بھارتی کمپنیوں کی سرمایہ کاری کا خواہاں ہے، جو سرمایہ کاروں کو پرکشش ترغیبات، مختلف ٹیکس اور کسٹم میں چھوٹ فراہم کرتا ہے۔

سائبر، فِن ٹیک اور AI میں تعاون بڑھانے پر زور

بھارت کے وزیر خارجہ ایس جے شنکر نے جمعرات کو دونوں ممالک کے درمیان اپنی پہلی اسٹریٹجک بات چیت کے بعد کہا کہ بھارت اور مصر اسٹارٹ اپس، فِن ٹیک، سائبر سکیورٹی اور مصنوعی ذہانت کے شعبوں میں تعاون کو بڑھانا چاہتے ہیں۔ مصر کے وزیر خارجہ ڈاکٹر بدر عبدالعاطی دو روزہ دورے پر نئی دہلی پہنچے، جہاں انہوں نے جے شنکر کے ساتھ بھارت-مصر اسٹریٹجک مذاکرات کی مشترکہ صدارت کی۔ایس جے شنکر نے 2023 میں قائم کی گئی بھارت-مصر اسٹریٹجک شراکت داری کے بعد دونوں ممالک کے درمیان بڑھتے ہوئے تعلقات کو سراہا۔ انہوں نے کہا کہ دونوں فریقوں نے سیاسی، اقتصادی، دفاعی، سمندری اور انسدادِ دہشت گردی کے شعبوں میں تعاون بڑھانے پر تبادلۂ خیال کیا۔

سویج کینال اکنامک زون میں سرمایہ کاری کی دعوت

سابق سفیر انل تریگنایت نے عرب نیوز کو بتایا کہ دونوں فریق ڈیجیٹل پبلک انفراسٹرکچر، فِن ٹیک، دواسازی، اسٹارٹ اپس، اختراعات (innovation) اور قابل تجدید توانائی میں سرمایہ کاری کے امکانات تلاش کرنے پر متفق ہوئے ہیں۔ مصر کے وزیر خارجہ بدر عبدالعاطی نے سویج کینال اکنامک زون کو بھارتی کمپنیوں کے لیے ایک اہم سرمایہ کاری کا موقع قرار دیا اور کہا کہ مصر، جو ایک بین البراعظمی ملک ہے، بحر احمر کے شمال مغرب میں سویج کی خلیج کے کنارے ایک بھارتی صنعتی زون قائم کرنے کا خواہاں ہے۔

بھارت ایکسپریس اردو۔