Health Tips: اکثر رات یا صبح کے وقت ہی کیوں آتا ہے ہارٹ اٹیک؟ جانئے وجوہات اور بچاؤ کے طریقے

نئی دہلی: سوال اکثر لوگوں کے ذہن میں آتا ہے کہ ہارٹ اٹیک زیادہ تر رات یا صبح سویرے ہی کیوں ہوتا ہے؟ اکثر لوگ اسے صرف ذہنی دباؤ کا نتیجہ سمجھتے ہیں، لیکن دراصل اس کے پیچھے انسانی جسم کی حیاتیاتی گھڑی (Circadian Rhythm) کا بھی بڑا کردار ہوتا ہے۔

ہمارا جسم دن اور رات کے حساب سے اپنے اعضاء کی کارکردگی کو کنٹرول کرتا ہے۔ رات کے وقت، خاص طور پر 2 سے 5 بجے کے درمیان، بلڈ پریشر اور دل کی دھڑکن اپنی کم ترین سطح پر ہوتی ہے۔ اگر دل پہلے سے کمزور ہو تو اس وقت خون کی گردش میں معمولی کمی بھی دل پر دباؤ ڈال سکتی ہے، جس سے ہارٹ اٹیک کا خطرہ بڑھ جاتا ہے۔

صبح کے وقت جسم میں کورٹیسول ہارمون کی مقدار بڑھ جاتی ہے، جس سے خون گاڑھا ہو جاتا ہے اور پلیٹ لیٹس آپس میں چپکنے لگتے ہیں، نتیجتاً خون کے لوتھڑے (Blood Clots) بننے کا امکان زیادہ ہو جاتا ہے۔

کئی لوگوں کو نیند کے دوران کھرّاٹے یا سانس رکنے (Sleep Apnea) کی شکایت ہوتی ہے، جس سے آکسیجن کی کمی ہو جاتی ہے اور دل پر اچانک دباؤ آتا ہے۔ رات میں بھاری یا تلا بھُنا کھانا کھانے کے بعد فوراً لیٹنے سے ایسڈ ریفلوکس اور گیس دل پر اضافی دباؤ ڈال سکتے ہیں۔ دن بھر کا تناؤ اور بے چینی بھی اگر رات تک باقی رہے تو بلڈ پریشر بڑھ جاتا ہے اور دل کی دھڑکن بے ترتیب ہو سکتی ہے۔

اگر رات میں سینے میں بھاری پن، بائیں بازو یا جبڑے میں درد، ٹھنڈا پسینہ، سانس پھولنا یا چکر محسوس ہو تو اسے کبھی نظرانداز نہ کریں اور فوراً ڈاکٹر سے رجوع کریں۔

آیورویدک مشورے:

                سونے سے پہلے نیم گرم پانی پینے سے ہاضمہ بہتر رہتا ہے اور دل پر دباؤ کم ہوتا ہے۔

                ارجن کی چھال کا قہوہ یا چورن دودھ میں ابال کر پینے سے دل کے مسلز مضبوط رہتے ہیں۔

                لہسن کے استعمال سے کولیسٹرول کم ہوتا ہے اور شریانیں صاف رہتی ہیں۔

                تلسی اور شہد کا استعمال خون میں آکسیجن بڑھاتا ہے اور دل کی تھکن کم کرتا ہے۔

رات میں 10 منٹ میڈیٹیشن یا سانس کی مشقیں کرنے سے دل کی رفتار متوازن رہتی ہے اور ذہنی سکون ملتا ہے۔ اگر اچانک سینے میں بھاری پن محسوس ہو تو نیم گرم پانی یا اجوائن اور کالا نمک کا استعمال کریں، گہری سانسیں لیں اور جسم کو سیدھا رکھیں۔

دل کو صحت مند رکھنے کے لیے روزانہ ہلکی چہل قدمی کریں، سگریٹ و شراب سے پرہیز کریں، نمک کم لیں، تناؤ کم کریں اور پوری نیند لیں۔

بھارت ایکسپریس۔