Yaad-e-Bismillah: ممبئی میں ’یادِ بسم اللہ‘ کے سُروں سے گونجا استاد بسم اللہ خان کا اَمر سنگیت

ممبئی: پربھادیوی کے رویندر ناٹیہ مندر کا مرکزی آڈیٹوریم 12 ستمبر کی شام ہندوستانی کلاسیکی موسیقی کے ایک منفرد جشن میں ڈوب گیا۔ بھارت رتن استاد بسم اللہ خان کی یاد کو وقف ’’یادِ بسم اللہ‘‘ پروگرام نے نہ صرف ان کی عظیم وراثت کو سلام پیش کیا بلکہ شہنائی کی مدھر دھنوں اور سُروں کی بارش نے سامعین کو روحانی طور پر مسحور کر دیا۔

ایک شاندار انعقاد اور سرکاری اعزاز

مدھو مرچھنا سنستھا کی جانب سے منعقدہ اس تقریب میں مہمانِ خصوصی مہاراشٹر حکومت کے ثقافتی وزیر ایڈووکیٹ آشی شیلار موجود رہے۔ اس موقع پر ایک یادگار لمحہ تب دیکھنے کو ملا جب پروگرام کی کنوینر اور استاد بسم اللہ خان کی شاگردہ و دَتک بیٹی، پدم شری ڈاکٹر سوما گھوش نے ’’دی میموریل بھارت رتن بسم اللہ خان سمان‘‘ سے مشہور طبلہ نواز پدم شری پنڈت سریش تلولکر کو چاندی کی شہنائی پیش کر کے اعزاز بخشا۔ یہ ایوارڈ ان کی کلاسیکی موسیقی کے میدان میں شاندار خدمات کا اعتراف تھا۔

سُروں کا جادو اور مسحور کن پیشکشیں

تقریب کی شروعات بنارس گھرانے کی نامور گلوکارہ ڈاکٹر سوما گھوش نے اپنی گائیکی سے کی۔ اپنی دلکش اور پُراثر آواز سے انہوں نے راگوں کی  ایسی بناوٹ بنی کہ پورا ہال تالیوں کی گڑگڑاہٹ سے گونج اُٹھا۔ اس کے بعد اونکار اگنی ہوتری، اکشرا ویاس اور رِشیکیش کرمکار نے ایک ٹرایو کے طور پر اپنی سُریلی پیشکش دے کر سامعین کے دل جیت لیے۔ نذیش جبّار حسین خان، نوین اوبی رائے اور راہل ملن کی سنگت نے اس محفل کو اور بھی دلکش بنا دیا۔

استاد کی زندگی کا جیتا جاگتا عکس

ایک خاص کشش استاد بسم اللہ خان کی زندگی پر مبنی ڈاکیو-ڈراما تھا، جس کی ہدایت کاری شبھانکر گھوش نے کی۔ اس پیشکش نے شہنائی سمراٹ کے جدوجہد، ریاض اور لازوال سفر کو نہایت ہی اثرانگیز اور بصری انداز میں پیش کیا ، جس نے حاضرین کو ان کی زندگی کے مختلف پہلوؤں سے رو برو کرایا۔

ثقافتی شام کا گواہ بنا ممبئی کا ایلیٹ سماج

اس ثقافتی شام میں ممبئی کے معزز شہریوں، فنکاروں اور موسیقی کے دلدادگان کی بڑی تعداد شریک رہی۔ اداکار گورو پرتیک، موسیقار وِویک پرکاش اور وِشال شلکے، شاعرہ ڈاکٹر منجو لوڈھا سمیت کئی شخصیات نے اس تاریخی شام کو یادگار بنایا۔ پروگرام کی کامیاب میزبانی آنند سنگھ نے کی۔ یہ شام استاد بسم اللہ خان کی اَمر دھنوں اور ان کی ناقابلِ فراموش وراثت کو سچی خراجِ عقیدت ثابت ہوئی۔

بھارت ایکسپریس۔