Online Betting Case: آن لائن سٹے بازی کیس میں اب بادشاہ پر کساشکنجہ ! مہاراشٹر پولیس نے ریپر سے کی پوچھ گچھ

آن لائن بیٹنگ کمپنی ایپ فیئر پلے کیس کے تار اب ریپر اور گلوکار بادشاہ سے بھی جڑے ہوئے دکھائی دیتے ہیں۔ خبر رساں ایجنسی اے این آئی کے مطابق پیر کو مہاراشٹر پولیس کے سائبر سیل نے آن لائن بیٹنگ کمپنی ایپ فیئر پلے کے معاملے میں بادشاہ سے پوچھ گچھ کی ہے۔ آپ کو بتاتے چلیں کہ اس معاملے میں اداکار رنبیر کپور، سنجے دت، کپل شرما اور شردھا کپور سمیت 40 ستاروں کے نام سامنے آئے تھے۔

بادشاہ پر مہادیو ایپ کی ذیلی کمپنی فیئر پلے کو فروغ دینے کا الزام ہے۔ یہی وجہ ہے کہ ریپر کو پوچھ گچھ کے لیے طلب کیا گیا تھا۔ بادشاہ نے اس ایپ کو پروموٹ کیا تھا۔ فیئر پلے نے انڈین پریمیئر لیگ (آئی پی ایل) 2023 کی اسکریننگ کی تھی۔ ایسے میں ایپ کے خلاف ڈیجیٹل پائریسی کا معاملہ درج کیا گیا تھا۔

کیا ہے سارا معاملہ؟

دراصل 2023 سے 2027 تک آئی پی ایل کے نشریاتی حقوق وائی کام 18 کے پاس تھے لیکن اس کے باوجود فیئر پلے نے مارچ 2023 سے مئی 2023 تک کرکٹ ٹورنامنٹ کو اپنے پلیٹ فارم پر دکھایا۔ جس کے بعد وائی کام 18 نے ایپ کے خلاف شکایت درج کرائی تھی۔

فیئر پلے نے بادشاہ کو برانڈ ایمبیسیڈر بنا دیا

فیئر پلے ایک گیمنگ ایکسچینج ایپ ہے جسے کوراکاؤ حکام نے لائسنس دیا ہے۔ ابتدائی مہینوں میں اس ایپ نے ریپر کو اپنا برانڈ ایمبیسیڈر بنا لیا۔ Viacom 18 نیٹ ورک کی شکایت کے بعد مہاراشٹر پولیس کے سائبر سیل نے آن لائن بیٹنگ کمپنی ایپ فیئر پلے کے خلاف چوری کا مقدمہ درج کیا تھا۔ ویاکام 18 نیٹ ورک نے ریپر اور اداکار سنجے دت سمیت 40 ستاروں کے خلاف ایف آئی آر درج کرائی تھی۔ ان ستاروں نے ایپ کو پروموٹ کیا تھا۔