اتر پردیش میں غیر تسلیم شدہ مدارس کے نصاب کی جدید کاری

کانپور، 1 نومبر (بھارت ایکسپریس):   اتر پردیش کے مدارس، جو دیوبند کے دارالعلوم کے نصاب کی پیروی کرتے ہیں، اب ان میں تسلیم شدہ مدارس کے برابر کرنے کے لیے تبدیلیاں شروع کریں گے۔ جمعیۃ علماء ہند کے جنرل سکریٹری، حافظ قدوس ہادی، جو شہر قاضی کانپور بھی ہیں، نے کہا کہ غیر تسلیم شدہ مدارس کا انتظام کرنے والوں سے طلبہ کے لیے جدید تعلیم کی منصوبہ بندی کرنے کو کہا جا رہا ہے۔

صرف مذہبی تعلیم دینے والے مدارس کو نصاب میں ریاضی، انگریزی، کمپیوٹر، ہندی اور دیگر مضامین شامل کرنے کی ہدایت دی گئی ہے۔”ہم نصاب میں تبدیلیاں لانے پر کام کر رہے ہیں۔ مدارس کا انتظام کرنے والی کمیٹی کا اجلاس جلد بلایا جائے گا۔ مدرسہ ایجوکیشن کونسل کے ذریعہ تسلیم شدہ مدارس پہلے ہی اپنے طلباء کو مختلف مضامین پڑھا رہے ہیں۔

تسلیم شدہ مدارس نے NCERT کا نصاب نافذ کیا ہے، جہاں طلباء کے لیے سات مضامین لازمی ہیں۔ دوسری طرف غیر تسلیم شدہ مدارس دارالعلوم دیوبند اور بریلی شریف کے نصاب کے ساتھ مذہبی تعلیمات تک محدود ہیں۔ حال ہی میں ریاستی حکومت نے اتر پردیش میں نجی، غیر تسلیم شدہ مدارس کا سروے کیا۔

10 ستمبر کو شروع ہونے والی مشق 20 اکتوبر کو اختتام پذیر ہوئی۔ سروے ٹیم نے کمائی، اخراجات اور وہاں پڑھائے جانے والے مضامین کی تفصیلات جمع کیں۔واضح رہے کہ دارالعلوم دیوبند نے مدرسہ کے منتظمین سے سروے میں تعاون کرنے کو کہا تھا۔