Indonesia: انڈونیشیا میں زلزلے کی ریکٹر اسکیل پر شدت7.3 ریکارڈ کی گئی

Indonesia: انڈونیشیا کے سماٹرا جزیرے کے مشرقی حصے میں منگل 25 اپریل کو 7.3 شدت کا زلزلہ آیا۔ اس کے بعد انڈونیشیا کی جیو فزکس ایجنسی (BMKG) نے بھی سونامی کی وارننگ جاری کر دی ہے۔ یورپی میڈیٹیرینین سیسمولوجیکل سینٹر (EMSC) نے اس سے قبل زلزلے کی شدت 6.9 بتائی تھی۔

انڈونیشیا کے محکمہ موسمیات کا کہنا ہے کہ زلزلے کا مرکز زمین کے نیچے 84 کلومیٹر ریکارڈ کیا گیا ہے۔ ماہرین ارضیات کا کہنا ہے کہ اس کی وجہ سے سونامی کا امکان ہے۔ زلزلے کے بعد ایجنسی نے مقامی حکام سے کہا ہے کہ وہ متاثرہ علاقے کے قریب رہنے والے لوگوں کو فوری طور پر ساحل سے دور رہنے کی ہدایت جاری  کریں۔

سماٹرا کے دارالحکومت پاڈانگ میں زلزلے کے جھٹکے

انڈونیشیا کے محکمہ موسمیات کے ترجمان عبدالمہری نے ملک کی ڈیزاسٹر مٹیگیشن ایجنسی کے حوالے سے بتایا کہ ہم سماٹرا کے مغربی ساحل سے قریب ترین جزیرے سے ڈیٹا اکٹھا کر رہے ہیں۔ عبدالمہری نے بتایا کہ مغربی سماٹرا کے دارالحکومت پاڈانگ میں زلزلے کے شدید جھٹکے محسوس کیے گئے اور کچھ لوگ ساحلوں سے دور محفوظ مقامات پر منتقل ہو گئے ہیں۔

زلزلے کے بعد مقامی لوگ اپنے گھربارچھوڑ کر محفوظ مقامات کی طرف منتقل ہو گئے ہیں۔ لوگوں میں  دہشت اور  خوف کا ماحول بنا ہوا ہے ۔قابل ذکر بات یہ ہے کہ انتظامیہ حالات کو قابو میں رکھنے کی کوشش کر رہی ہے۔