Women’s Asia Cup: ویمنز ایشیا کپ، امپائر کے فیصلے سے اختلاف پاکستانی بلے باز کو پڑا مہنگا، آئی سی سی نے جرمانہ عائد کیا

ویمنز ایشیا کپ 2026 میں ہانگ کانگ، چین کے خلاف پیر کو کھیلے گئے میچ کے دوران آئی سی سی کے ضابطہ اخلاق کی خلاف ورزی پاکستانی بلے باز گل فیروزہ کو مہنگی پڑ گئی۔ ان پر میچ فیس کا 10 فیصد جرمانہ عائد کیا گیا ہے، جبکہ ان کے ڈسپلنری ریکارڈ میں ایک ڈی میرٹ پوائنٹ بھی شامل کردیا گیا ہے۔ یہ واقعہ پاکستانی اننگز کے پانچویں اوور میں پیش آیا، جب گل فیروزہ کو ایل بی ڈبلیو آؤٹ قرار دیا گیا۔ آؤٹ دیے جانے کے بعد فیروزہ نے اپنے بلے کی جانب اشارہ کرتے ہوئے امپائر کے فیصلے سے اختلاف کا اظہار کیا۔ ان کا کہنا تھا کہ گیند ان کے بلے کے کنارے سے لگی تھی، جس کے باعث وہ امپائر کے فیصلے سے متفق نہیں تھیں۔ گل فیروزہ کو پلیئرز اور پلیئر سپورٹ پرسنل کے لیے آئی سی سی کے ضابطہ اخلاق کے آرٹیکل 2.8 کی خلاف ورزی کا قصوروار پایا گیا۔ اس آرٹیکل کے تحت بین الاقوامی میچ کے دوران امپائر کے فیصلے سے اختلاف کا اظہار کرنا ضابطے کی خلاف ورزی ہے۔

24 ماہ میں دوسری مرتبہ خلاف ورزی

یہ گل فیروزہ کی 24 ماہ کے دوران دوسری ڈسپلنری خلاف ورزی ہے۔ تازہ سزا کے بعد اس مدت کے دوران ان کے ڈی میرٹ پوائنٹس کی تعداد بڑھ کر دو ہوگئی ہے۔ اس سے قبل انہیں 23 جون کو آسٹریلیا کے خلاف ویمنز ٹی20 ورلڈ کپ کے لیگ میچ کے دوران پیش آنے والے ایک واقعے پر ایک ڈی میرٹ پوائنٹ دیا گیا تھا۔ نئی سزا کے بعد ان کے ریکارڈ میں مجموعی طور پر دو ڈی میرٹ پوائنٹس درج ہوگئے ہیں۔

گل فیروزہ نے ایمریٹس آئی سی سی انٹرنیشنل پینل آف میچ ریفریز کی سپریا رانی داس کی جانب سے تجویز کردہ سزا کو قبول کرلیا۔ اس وجہ سے معاملے میں کسی رسمی سماعت کی ضرورت نہیں پڑی۔ یہ الزام آن فیلڈ امپائرز رباب احسن اور رقیہ سلطانہ، تھرڈ امپائر شیوَانی مشرا اور فورتھ امپائر شتیرا ذاکر نے عائد کیا تھا۔

لیول ون خلاف ورزی پر کیا سزا ہوتی ہے؟

آئی سی سی کے ضابطہ اخلاق کے لیول ون کی خلاف ورزی پر کم سے کم سزا باضابطہ سرزنش ہے، جبکہ زیادہ سے زیادہ سزا کھلاڑی کی میچ فیس کا 50 فیصد جرمانہ اور ایک یا دو ڈی میرٹ پوائنٹس ہوسکتے ہیں۔ آئی سی سی کے ڈسپلنری نظام کے مطابق 24 ماہ کے دوران کسی کھلاڑی کے چار یا اس سے زیادہ ڈی میرٹ پوائنٹس کو معطلی کے پوائنٹس میں تبدیل کردیا جاتا ہے۔ دو سسپنشن پوائنٹس کی صورت میں کھلاڑی پر ایک ٹیسٹ، دو ون ڈے یا دو ٹی20 میچوں کی پابندی عائد کی جاسکتی ہے، جو بھی پہلے ہو۔

بھارت ایکسپریس اردو۔