Pickleball tournament: ممبئی میں سہ روزہ پِکل بال ٹورٹامنٹ کا آغاز، سیکڑوں کھلاڑیوں کی شرکت

پکل بال کے تیزی سے مقبول ہوتے ہوئے کھیل نے ممبئی میں دھمال مچا رکھا ہے۔ اس سلسلے میں باضابطہ طور پر ممبئی میں تین روزہ پکل بال ٹورنامنٹ کا آغاز ہو گیا ہے، جس میں بچوں سے لے کر بزرگ شہریوں تک 700 سے زیادہ پرجوش کھلاڑی حصہ لے رہے ہیں۔ Pickle Point کے زیر اہتمام یہ ٹورنامنٹ پورے ہندوستان میں پکل بال گیم کے فروغ میں ایک اہم سنگ میل ہے۔

واضح رہے کہ  ریاستہائے متحدہ میں شروع ہونے والے پکل بال کھیل نے دنیا بھر میں تیزی سے مقبولیت حاصل کی ہے اور اب یہ ہندوستان میں بھی فروغ پا رہی ہے۔ پکل پوئنٹ کے شریک بانی-ویوان تلریجا، ہرش ادنانی، اور ویوان ملکانی کے مطابق خاص طور پر کووڈ کے بعد اس کھیل کی مانگ میں ڈرامائی طور پر اضافہ ہوا ہے۔ شریک بانیوں میں سے ایک نے کہا ’’10 سے 60 سال کی عمر کے لوگ اس کھیل کو کھیل رہے ہیں۔ یہ ٹینس اور بیڈمنٹن کا ایک بہترین امتزاج ہے۔‘‘ پرنسپل ڈاکٹر مسز وندنا لولا اور کھلاڑی آریانا انل ابراہم اس ٹورنامنٹ کی رہنمائی کر رہے ہیں اور اس کھیل کی ترقی میں فعال طور پر تعاون کر رہے ہیں۔

سہولیات اور شرکت

ممبئی میں اب 200 سے زیادہ پکل بال کورٹس ہیں، جن میں کھلاڑیوں کو آفیشل ویب سائٹ کے ذریعے سلاٹ بک کرنے کی سہولت فراہم ہے۔ کھیل کے فارمیٹ میں دو بہ دو میچز شامل ہوتے ہیں، جن میں بہترین کارکردگی کے ساتھ کھلاڑی پوائنٹس حاصل کرتے ہیں اور مسلسل اسکورنگ ان کی مسابقتی درجہ بندی کو بہتر بناتی رہتی ہے۔ دہلی، گروگرام، بنگلورو اور چنئی سمیت مختلف شہروں کے کھلاڑیوں نے اس میں حصہ لیا ہے۔

کیا ہے پکل بال کھیل؟

پکل بال ایک پیڈل کھیل ہے جو ٹینس، بیڈمنٹن اور ٹیبل ٹینس کے عناصر کا امتزاج پیش کرتا ہے۔ بیڈمنٹن کورٹ کی طرح ہی 44 بائی 20 فٹ کے کورٹ پر کھیلے جانے والے اس گیم میں کھلاڑی ٹھوس پیڈلز کا استعمال کرتے ہوئے ٹینس طرز کے جال پر سوراخ شدہ پلاسٹک کی گیند کو مارتے ہیں۔ اس کھیل میں سنگلز اور ڈبلز دونوں فارمیٹس عام ہیں اور اس کے قواعد تیز ریلیوں اور اسٹریٹجک کھیل پر توجہ دیتے ہیں۔

حالیہ برسوں میں اس کھیل کو نہایت مقبولیت ملی ہے اور اب یہ 70 سے زیادہ ممالک میں کھیلا جاتا ہے۔ ہندوستان میں بھی تیزی سے یہ کھیل مقبول ہو رہا ہے اور ممبئی میں اس طرح کے ٹورنامنٹ اس کھیل کے فروغ میں اہم کردار ادا کر رہے ہیں۔ یہ ٹورنامنٹ آج شروع ہوا ہے اور اگلے دو دن تک جاری رہے گا۔ جیتنے والوں کو انعامات اور سرٹیفکیٹ سے نوازا جائے گا۔

بھارت ایکسپریس اردو