India Vs Pakistan T-20: پاکستان نے ٹاس جیت کر بھارت کے خلاف فیلڈنگ کا کیا فیصلہ، کولمبو کے پریم داسا اسٹیڈیم میں ہائی وولٹیج مقابلہ شروع

کولمبو: آئی سی سی مینز ٹی 20 ورلڈ کپ میں گروپ اے کے اہم مقابلے میں پاکستان نے بھارت کے خلاف ٹاس جیت کر پہلے فیلڈنگ کرنے کا فیصلہ کیا ہے۔ یہ سنسنی خیز مقابلہ کولمبو کے آر پریم داسا اسٹیڈیم میں کھیلا جا رہا ہے۔ ٹاس جیتنے کے بعد پاکستانی کپتان سلمان علی آغا نے کہا: ’’ہم پہلے گیند بازی کرنا چاہتے ہیں۔ وکٹ تھوڑی چپچپی محسوس ہو رہی ہے، اس لیے ابتدائی اوورز میں گیند بازوں کو مدد مل سکتی ہے۔ ہم اپنے گروپ میں پُرسکون اور اس چیلنج کے لیے پُرجوش ہیں۔ یہ گراؤنڈ ایس ایس سی سے بڑا ہے اور پچ بھی نسبتاً سست ہے۔ ہم اسی ٹیم کے ساتھ کھیل رہے ہیں۔‘‘ بھارتی کپتان سوریہ کمار یادو نے کہا: ’’ہم دراصل پہلے بیٹنگ کرنا چاہتے تھے۔ ہم نے پچھلے دو میچ دفاع کرتے ہوئے جیتے ہیں، اس لیے ہم حکمت عملی تبدیل نہیں کرنا چاہتے تھے۔ یہ بڑا موقع اور دباؤ والا میچ ہے۔ یہ کھیل آپ کو بہت کچھ سکھاتا ہے، کسی بھی دن کوئی بھی ٹیم جیت سکتی ہے۔ ہم نے دو تبدیلیاں کی ہیں ابھیشیک شرما ٹیم میں آئے ہیں اور کلدیپ یادو ارشدیپ سنگھ کی جگہ شامل ہوئے ہیں۔‘‘

باہمی ریکارڈ میں بھارت کو برتری

ٹی 20 ورلڈ کپ کی تاریخ میں بھارت اور پاکستان آٹھ مرتبہ آمنے سامنے آ چکے ہیں، جن میں سے سات میں بھارت نے کامیابی حاصل کی جبکہ پاکستان صرف ایک میچ جیت سکا ہے۔ مجموعی طور پر دونوں ٹیمیں ٹی 20 انٹرنیشنل کرکٹ میں 16 بار مدمقابل ہو چکی ہیں۔ ان میں بھارت نے 13 جبکہ پاکستان نے تین فتوحات حاصل کی ہیں۔

گروپ اے کی صورتحال

ٹورنامنٹ میں اب تک دونوں ٹیمیں دو، دو میچ کھیل چکی ہیں اور دونوں نے اپنے مقابلے جیتے ہیں۔ بھارت نے امریکہ اور نمیبیا کو شکست دی، جبکہ پاکستان نے نیدرلینڈز اور امریکہ کے خلاف کامیابی حاصل کی۔  سوریہ کمار یادو کی قیادت میں بھارتی ٹیم چار پوائنٹس اور +3.050 نیٹ رن ریٹ کے ساتھ گروپ اے میں سرفہرست ہے، جبکہ پاکستان چار پوائنٹس اور +0.932 نیٹ رن ریٹ کے ساتھ دوسرے نمبر پر موجود ہے۔

دونوں ٹیموں کی پلیئنگ الیون

بھارت: ایشان کشن (وکٹ کیپر)، ابھیشیک شرما، تلک ورما، سوریہ کمار یادو (کپتان)، ہاردک پانڈیا، شیوم دوبے، رنکو سنگھ، اکشر پٹیل، کلدیپ یادو، ورون چکرورتی، جسپریت بمراہ۔

پاکستان: صائم ایوب، صاحبزادہ فرحان، سلمان آغا (کپتان)، بابر اعظم، محمد نواز، شاداب خان، فہیم اشرف، عثمان خان (وکٹ کیپر)، شاہین آفریدی، ابرار احمد، عثمان طارق۔

کرکٹ کی دنیا کی سب سے بڑی رقابتوں میں شمار ہونے والا یہ مقابلہ ایک بار پھر شائقین کو سنسنی خیز لمحات فراہم کرنے کے لیے تیار ہے۔

بھارت ایکسپریس اردو۔