Spain Vs Argentina: اسپین نے ایک بار پھر رقم کر دی تاریخ، ارجنٹینا کو شکست دے کر بن گیا ورلڈ چیمپئن

فیفا ورلڈ کپ 2026 کا فائنل انتہائی سنسنی خیز ثابت ہوا، جہاں اسپین نے ارجنٹینا کو 1-0 سے شکست دے کر دوسری بار عالمی چیمپئن بننے کا اعزاز حاصل کر لیا۔ میچ پورے 120 منٹ تک جاری رہا اور آخرکار متبادل کھلاڑی فیران ٹوریس نے اضافی وقت میں فیصلہ کن گول کر کے اسپین کو فتح دلائی۔ 106ویں منٹ میں کیا گیا یہ گول ارجنٹینا کے لیے بڑا دھچکا ثابت ہوا۔

میچ پر اسپین کا مکمل غلبہ

میچ کے آغاز ہی سے اسپین نے کھیل پر اپنی گرفت مضبوط رکھی۔ ٹیم کا دفاع نہایت مستحکم جبکہ حملہ تیز اور منظم رہا۔ ارجنٹینا نے گزشتہ مقابلوں میں آخری لمحات میں شاندار واپسی کی تھی، لیکن اس بار اسپین نے اسے کوئی موقع نہیں دیا۔ مقررہ 90 منٹ اور اضافی وقت کے پہلے حصے تک اسپین نے گول پر 19 حملے کیے، جن میں سے 10 شاٹس ہدف پر رہے۔ ایک گول فاؤل کی وجہ سے مسترد بھی کر دیا گیا۔ بالآخر اضافی وقت کے دوسرے ہاف کے آغاز میں فیران ٹوریس نے بائیں پاؤں سے زبردست شاٹ لگا کر گیند جال میں پہنچا دی۔

ارجنٹینا کی مایوس کن کارکردگی

لیونل میسی اس فائنل میں اپنا جادو جگانے میں ناکام رہے۔ اسپین کے گول سے پہلے تک ارجنٹینا ایک بھی شاٹ گول پوسٹ کے اندر نہیں لگا سکا۔ آخری لمحات میں ٹیم کو تین مواقع ضرور ملے، لیکن کوئی بھی شاٹ ہدف پر نہ جا سکا، جو اس کی شکست کی بڑی وجہ بنا۔

میسی کا ایک اور خواب ادھورا رہ گیا

ارجنٹینا مسلسل دوسری اور مجموعی طور پر چوتھی بار ورلڈ کپ جیتنے کا خواب دیکھ رہا تھا، مگر اسپین نے اس کی امیدوں پر پانی پھیر دیا۔ لیونل میسی بھی اپنے کیریئر کا اختتام ایک اور ورلڈ کپ ٹرافی کے ساتھ کرنے کی خواہش پوری نہ کر سکے۔

2010 کی تاریخ ایک بار پھر دہرائی گئی

اسپین نے دوسری مرتبہ فیفا ورلڈ کپ کا خطاب جیتا اور دلچسپ بات یہ رہی کہ اس کامیابی نے 2010 کی یادیں تازہ کر دیں۔ اُس وقت بھی اسپین نے اضافی وقت میں گول کر کے عالمی کپ اپنے نام کیا تھا۔ ایک اور دلچسپ اتفاق یہ ہے کہ دونوں مرتبہ ورلڈ کپ جیتنے سے دو سال قبل اسپین نے یورو کپ بھی اپنے نام کیا تھا۔ 2024 میں یورو کپ جیتنے کے بعد اب 2026 میں عالمی چیمپئن بن کر اسپین نے ایک بار پھر تاریخ دہرا دی۔

بھارت ایکسپریس اردو۔