Asian Games 2026: نیرو ڈھانڈا نے ملک کو دلایا پانچواں گولڈ، خواتین کے ٹریپ انفرادی مقابلے میں رقم کی تاریخ

نئی دہلی : ایشیئن گیمز 2026 میں ہندوستان نے پانچواں گولڈ میڈل جیت لیا ہے۔ اپنا پہلا ایشیئن گیمز کھیل رہی نیرو ڈھانڈا نے تاریخ رقم کرتے ہوئے خواتین کے ٹریپ انفرادی مقابلے کے فائنل میں 28 کے ایشیائی ریکارڈ اسکور کے ساتھ گولڈ میڈل جیتا۔ وہ ایشیئن گیمز کی تاریخ میں ٹریپ مقابلے میں گولڈ میڈل جیتنے والی پہلی ہندوستانی خاتون شوٹر بن گئی ہیں۔

کوالیفکیشن میں بھی ٹاپ پر رہیں

نیرو ڈھانڈا نے کوالیفکیشن راؤنڈ میں 118 کے اسکور کے ساتھ پہلی پوزیشن حاصل کی تھی۔ فائنل میں انہوں نے 28 کے اسکور کے ساتھ ایشیائی ریکارڈ قائم کیا اور ایشیئن گیمز کی تاریخ میں ٹریپ مقابلے میں گولڈ جیتنے والی پہلی ہندوستانی خاتون بن گئیں۔ اس کے علاوہ نیرو ایشیئن گیمز کے ٹریپ انفرادی مقابلے میں میڈل جیتنے والی پہلی ہندوستانی کھلاڑی بھی ہیں۔

فائنل میں شاندار واپسی

نیرو فائنل میں بہترین فارم میں نظر آئیں۔ ان کا پہلا شاٹ نویں کوشش میں مس ہوا، جس کے بعد وہ کچھ دیر کے لیے تیسرے نمبر پر چلی گئی تھیں۔ تاہم تیسری اور چوتھی سیریز میں مسلسل درست نشانے لگاتے ہوئے انہوں نے زبردست واپسی کی۔20 شاٹس میں 19 کامیاب ہٹ کے ساتھ نیرو دوبارہ ٹاپ پر پہنچ گئیں۔ پانچویں سیریز میں ایک شاٹ مس ہونے کے باوجود انہوں نے اپنی گولڈ میڈل کی پوزیشن برقرار رکھی۔ اس کے بعد آخری سیریز میں پانچوں نشانے درست لگا کر انہوں نے شاندار انداز میں گولڈ میڈل اپنے نام کر لیا۔نیرو نے اپنے پہلے ہی ایشیئن گیمز میں تاریخی گولڈ میڈل جیتنے کے دوران 30 میں سے صرف 2 شاٹس مس کیے۔

چین اور کویت کی کھلاڑیوں نے جیتے سلور اور برونز

چین کی یونونگ سن نے 26 کے اسکور کے ساتھ سلور میڈل حاصل کیا، جبکہ کویت کی شوٹر نے 21 کے اسکور کے ساتھ برونز میڈل جیتا۔ایشیئن گیمز کے اس ایڈیشن میں شوٹنگ کے مقابلوں میں ہندوستان کا یہ دوسرا گولڈ میڈل ہے۔ مجموعی طور پر آئچی-ناگویا ایشیئن گیمز میں ہندوستان کا یہ پانچواں گولڈ میڈل ہے۔

ٹریپ ٹیم مقابلے میں بھی جیتا سلور

اس سے پہلے نیرو ڈھانڈا نے آج آشما اہلاوت اور منیشا کیر کے ساتھ ٹریپ ٹیم شوٹنگ مقابلے میں سلور میڈل بھی جیتا تھا۔ ہندوستانی ٹیم نے 3 دن تک جاری رہنے والے 125 شاٹس کے کوالیفکیشن راؤنڈ کے بعد مجموعی طور پر 328 کا اسکور بنایا اور سلور میڈل کے لیے کویت کی ٹیم کو پیچھے چھوڑ دیا۔

بھارت ایکسپریس اردو