ISL 2025-26 Season Start Date Confirmed: انڈین سپر لیگ کا آغاز 14 فروری سے، 14 ٹیموں کے درمیان کھیلے جائیں گے 91 میچ

نئی دہلی: ملک کے فٹبال شائقین کے لیے بڑی خوشخبری ہے کہ انڈین سپر لیگ 2026 کا باقاعدہ آغاز 14 فروری سے ہونے جا رہا ہے۔ اس سیزن میں ملک بھر کی 14 ٹیمیں حصہ لیں گی اور مجموعی طور پر 91 میچ کھیلے جائیں گے۔ اس کا باضابطہ اعلان منگل کو مرکزی وزیر کھیل منسکھ مانڈویہ نے نئی دہلی میں ایک پریس کانفرنس کے دوران کیا۔ کئی مہینوں سے کمرشل شراکت داروں کی کمی کے سبب لیگ کے آغاز پر غیر یقینی صورتحال بنی ہوئی تھی، جس کی وجہ سے کھیلوں کے حلقوں میں تنازع بھی پیدا ہوا۔ تاہم اب حکومت، فٹبال کلبوں اور منتظمین کے درمیان اتفاق رائے کے بعد لیگ کے انعقاد کی تاریخ طے کر دی گئی ہے، جس سے شائقین نے راحت کی سانس لی ہے۔

مرکزی وزیر کھیل نے میڈیا سے گفتگو کرتے ہوئے کہا کہ حکومت نے ملک میں کھیلوں کے ایکوسسٹم کو مضبوط بنانے کے لیے مختلف فٹبال کلبوں کے ساتھ مسلسل مشاورت کی۔ ان کے مطابق تمام 14 کلبوں کے نمائندوں کے ساتھ تفصیلی میٹنگ کے بعد یہ فیصلہ کیا گیا کہ انڈین سپر لیگ 14 فروری سے شروع کی جائے گی، تاکہ کھلاڑیوں کو بہتر مواقع اور شائقین کو معیاری مقابلے دیکھنے کو مل سکیں۔ اس سیزن میں شامل ٹیموں میں اے ٹی کے موہن باغان ایف سی، ایسٹ بنگال ایف سی، محمڈن، انٹر کاشی، ممبئی سٹی، چنئیئن، دہلی، بنگلورو، گوا، کیرالہ بلاسٹرز، پنجاب، نارتھ ایسٹ یونائیٹڈ، جمشیدپور اور اڈیشہ کی ٹیمیں شامل ہیں۔ یہ ٹیمیں مختلف شہروں میں ہوم اور اوے بنیاد پر ایک دوسرے کے خلاف مقابلہ کریں گی۔

منسکھ مانڈویہ نے کہا کہ یہ لیگ نہ صرف فٹبال کھلاڑیوں بلکہ کوچز، مینیجرز اور نوجوان ٹیلنٹ کے لیے بھی ایک بڑا پلیٹ فارم ثابت ہوگی۔ ان کے مطابق لیگ کے بہتر انتظام اور تجارتی فیصلوں کے لیے ایک گورننگ کونسل بورڈ تشکیل دیا جائے گا، جس میں آل انڈیا فٹبال فیڈریشن کا 25 فیصد حصہ ہوگا۔ یہ شراکت حکومت اور کھیل تنظیموں کے درمیان مضبوط تال میل کی عکاسی کرتی ہے۔

وزیر کھیل نے مزید بتایا کہ آئی لیگ بھی اسی عرصے کے دوران کھیلی جائے گی، جس میں 11 ٹیموں کے درمیان 55 میچ ہوں گے۔ ان کے مطابق ملک میں کھیلوں کی ثقافت تیزی سے فروغ پا رہی ہے، جو وزیر اعظم نریندر مودی کے وژن کے مطابق ہے، جس کا مقصد نچلی سطح سے لے کر پیشہ ورانہ سطح تک کھیلوں کو فروغ دینا ہے۔

بھارت ایکسپریس اردو