Indian Cricketer Shreyas Iyer: شریاس ایئر راجکوٹ ون ڈے میں تیز ترین 3000 رن بنانے والے بھارتی بلے باز بن سکتے ہیں

راجکوٹ: بھارتی کرکٹ ٹیم کے مڈل آرڈر کے مضبوط بلے باز شر یاس ایئر انجری سے صحت یاب ہونے کے بعد نیوزی لینڈ کے خلاف ون ڈے سیریز میں واپسی کر چکے ہیں۔ انہوں نے اتوار کو وڈودرا میں کھیلے گئے پہلے ون ڈے میں 47 گیندوں پر 49 رنز کی ذمہ دارانہ اننگز کھیل کر اپنے فارم میں ہونے کا واضح اشارہ دیا۔ بدھ کو سیریز کا دوسرا ون ڈے راجکوٹ میں کھیلا جائے گا، جہاں شر یاس ایئر کے پاس ایک بڑی ذاتی کامیابی حاصل کرنے کا سنہری موقع ہوگا۔

راجکوٹ ون ڈے میں شر یاس ایئر اپنی ون ڈے کیریئر کی 69ویں اننگز کھیلیں گے۔ اس میچ میں اگر وہ 34 رنز بنا لیتے ہیں تو ان کے ون ڈے کیریئر کے 3000 رنز مکمل ہو جائیں گے۔ اگر وہ اس سنگ میل کو عبور کر لیتے ہیں تو وہ بھارت کی جانب سے ون ڈے فارمیٹ میں سب سے تیز 3000 رنز بنانے والے بلے باز بن جائیں گے۔

اس وقت بھارت کے لیے ون ڈے میں سب سے تیز 3000 رنز بنانے کا ریکارڈ سابق اوپنر شکھر دھون کے نام ہے، جنہوں نے 72 اننگز میں یہ کارنامہ انجام دیا تھا۔ دوسرے نمبر پر وراٹ کوہلی ہیں، جنہوں نے 75 اننگز میں یہ ہدف حاصل کیا۔ اگر شر یاس ایئر راجکوٹ میں کامیاب ہو جاتے ہیں تو وہ کے ایل راہل، نوجوت سنگھ سدھو اور سورو گانگولی جیسے بڑے ناموں کو بھی پیچھے چھوڑ دیں گے۔ ون ڈے کرکٹ میں مجموعی طور پر سب سے تیز 3000 رنز بنانے کا عالمی ریکارڈ جنوبی افریقہ کے سابق بلے باز ہاشم آملہ کے نام ہے، جنہوں نے صرف 57 اننگز میں یہ سنگ میل عبور کیا تھا۔

شر یاس ایئر کے ون ڈے کیریئر پر نظر ڈالیں تو وہ اس وقت بھارتی ٹیم کے سب سے قابلِ اعتماد بلے بازوں میں شمار ہوتے ہیں۔ نمبر چار پر بیٹنگ کرتے ہوئے انہوں نے ون ڈے ورلڈ کپ 2023 میں بھارت کو فائنل تک پہنچانے میں اہم کردار ادا کیا تھا، جبکہ چیمپئنز ٹرافی 2025 کی جیت میں بھی ان کی کارکردگی فیصلہ کن رہی۔ 31 سالہ شر یاس ایئر نے 2017 میں سری لنکا کے خلاف اپنے ون ڈے کیریئر کا آغاز کیا تھا۔ اب تک وہ 74 میچوں کی 68 اننگز میں 2966 رنز بنا چکے ہیں، جن میں 5 سنچریاں اور 23 نصف سنچریاں شامل ہیں۔ ان کا بہترین اسکور ناٹ آؤٹ 128 رنز ہے۔ راجکوٹ ون ڈے میں ان کی نظریں تاریخ رقم کرنے پر ہوں گی۔

بھارت ایکسپریس اردو