Cricketer Rinku Singh Father Death: بھارتی کرکٹر رنکو سنگھ کے والد خان چند سنگھ کا انتقال، لمبے عرصے سے کینسر کی بیماری میں تھے مبتلا

گریٹر نوئیڈا: بھارتی کرکٹ ٹیم کے مایہ ناز کھلاڑی رنکو سنگھ کے والد خان چند سنگھ کا جمعہ کی صبح انتقال ہوگیا۔ وہ گزشتہ عرصے سے جگر کے کینسر کے مرض میں مبتلا تھے اور ان کی حالت گزشتہ چند ہفتوں سے تشویشناک بنی ہوئی تھی۔ اہل خانہ کے مطابق بیماری آخری مرحلے میں داخل ہوچکی تھی جس کے باعث ڈاکٹروں نے انہیں انتہائی نگہداشت میں رکھا ہوا تھا۔ خاندانی ذرائع کے مطابق طبیعت زیادہ بگڑنے پر انہیں 21 فروری کو گریٹر نوئیڈا کے ایک نجی اسپتال یتھارتھ ہاسپٹل میں داخل کرایا گیا تھا، جہاں انہیں وینٹی لیٹر سپورٹ پر رکھا گیا۔ اسپتال حکام نے بتایا کہ جمعہ کی صبح تقریباً چار بج کر 36 منٹ پر انہوں نے آخری سانس لی۔ صبح پانچ بجے کے قریب انتقال کی باضابطہ تصدیق کے بعد اہل خانہ میت کو گھر لے گئے، جہاں تعزیت کے لیے عزیز و اقارب اور مقامی افراد کی بڑی تعداد جمع ہوگئی۔

والد کی طبیعت نازک ہونے کی اطلاع ملتے ہی رنکو سنگھ قومی ٹیم کا کیمپ چھوڑ کر فوری طور پر گھر واپس آگئے تھے۔ اس وقت وہ چنئی میں ٹیم انڈیا کے ساتھ ٹی ٹوئنٹی ورلڈ کپ کی تیاریوں میں مصروف تھے۔ خاندانی ذمہ داریاں ادا کرنے کے بعد وہ 25 فروری کو دوبارہ ٹیم کے ساتھ جڑ گئے، تاہم 26 فروری کو زمبابوے کے خلاف کھیلے گئے سپر 8 مقابلے میں انہیں پلیئنگ الیون میں شامل نہیں کیا گیا اور وہ متبادل کھلاڑی کے طور پر ٹیم کے ہمراہ موجود رہے۔

رنکو سنگھ کا تعلق ایک متوسط گھرانے سے رہا ہے۔ ان کے والد خان چند سنگھ گھروں اور ہوٹلوں تک گیس سلنڈر پہنچانے کا کام کرتے تھے۔ خاندان کی مالی حالت مضبوط نہ ہونے کے باعث تمام بھائی اپنے والد کا ہاتھ بٹاتے تھے اور موٹر سائیکل پر سلنڈر رکھ کر روزگار میں مدد کرتے تھے۔ محدود وسائل کے باوجود انہوں نے اپنے بیٹے کے کرکٹ کے شوق کی حوصلہ افزائی جاری رکھی۔

کرکٹ کے ابتدائی دنوں میں رنکو سنگھ کو مشکلات کا سامنا کرنا پڑا۔ محلے کے دوستوں کے ساتھ مل کر چندہ جمع کیا جاتا اور اسی رقم سے گیند اور دیگر سامان خریدا جاتا تھا۔ آج وہ بھارتی کرکٹ کا نام بن چکے ہیں، تاہم ان کی کامیابی کے پیچھے والد کی محنت، قربانی اور حوصلہ افزائی کا اہم کردار رہا۔ ان کے انتقال پر خاندان، مداحوں اور کھیلوں کی دنیا میں گہرے رنج و غم کا اظہار کیا جا رہا ہے۔

بھارت ایکسپریس اردو۔