ICC T20 World Cup 2024 schedule announced: ٹی ٹونٹی ورلڈ کپ 2024 کا شیڈول جاری،9 جون کو بھارت اور پاکستان کے بیچ ہوگا مقابلہ

پوری دنیا میں لوگوں نے جشن کے ساتھ 2023 کو الوداع کیا اور 2024 کا شاندار استقبال کیا۔ بھارتی کرکٹ ٹیم نے بھی نئے سال کا سفر شروع کر دیا ہے۔ ہندوستانی ٹیم کے پاس اس سال آئی سی سی ٹرافی جیتنے کا سنہرا موقع ہے۔ اس سال آئی سی سی ٹی ٹوئنٹی ورلڈ کپ 2024 جون میں کھیلا جائے گا۔ اس کے لیے شیڈول کا اعلان کردیا گیا ہے۔ہندوستانی ٹیم کا پہلا مقابلہ 5 جون کو آئرلینڈ کے خلاف کھیلا جانا ہے۔ جبکہ دوسرا میچ 9 جون کو پاکستان کے خلاف کھیلا جائے گا۔ تیسرا میچ 12 جون کو امریکہ سے ہوگا۔ یہ تینوں میچ نیویارک میں کھیلے جائیں گے۔ آپ کو بتاتے چلیں کہ ٹی 20 ورلڈ کپ 2024 ویسٹ انڈیز اور امریکہ کی میزبانی میں کھیلا جائے گا۔

ٹی ٹوئنٹی ورلڈ کپ 2024

ٹی ٹونٹی ورلڈ کپ کے 2024 کے ایڈیشن میں حصہ لینے والی ٹیموں کی تعداد میں اضافہ دیکھنے کو مل رہا ہے، جس میں 20 قومی ٹیمیں حصہ لے رہی ہیں، جو پچھلے ٹورنامنٹ میں 16 تھیں۔ ٹیموں کو ابتدائی طور پر پانچ کے چار گروپس میں تقسیم کیاگیا ہے، ہر گروپ سے ٹاپ دو ٹیمیں سپر 8 مرحلے میں داخل ہوں گی۔ سپر 8 کا مرحلہ پھر چار کے دو گروپوں پر مشتمل ہوگا، جس میں سے ٹاپ دو ٹیمیں ناک آؤٹ مرحلے میں جائیں گی، جس کا اختتام سیمی فائنل اور فائنل میں ہوگا۔

ٹی ٹونٹی ورلڈ کپ میں سیمی فائنل اور فائنل میچ صرف ویسٹ انڈیز میں کھیلے جائیں گے۔ پہلا سیمی فائنل 26 جون کو گیانا میں کھیلا جائے گا۔ دوسرا سیمی فائنل 27 جون کو ٹرینیڈاڈ میں ہوگا۔ ٹورنامنٹ کا ٹائٹل میچ یعنی فائنل میچ 29 جون کو بارباڈوس میں کھیلا جائے گا۔ٹی ٹوئنٹی ورلڈ کپ 2024 کا پہلا میچ یکم جون کو کینیڈا اور امریکا کے درمیان کھیلا جائے گا۔ ورلڈ کپ کا فائنل میچ 29 جون کو ہوگا۔ ٹورنامنٹ میں گروپ مرحلے کے میچ یکم سے 18 جون کے درمیان کھیلے جائیں گے۔ اس کے بعد 19 سے 24 جون کے درمیان سپر 8 کے مقابلے ہوں گے۔ اس کے بعد 26 اور 27 جون کو سیمی فائنل اور آخر میں فائنل میچ 29 جون کو کھیلا جائے گا۔

بھارت ایکسپریس۔