Rajat Patidar Statement: میں نے خواب میں بھی نہیں سوچا تھا کہ آر سی بی کی قیادت کروں گا اور ٹرافی جیتوں گا، رجت پاٹیدار کا جذباتی بیان

نئی دہلی: رائل چیلنجرز بنگلورو (آر سی بی) کے کپتان رجت پاٹیدار نے آئی پی ایل 2026 کا خطاب جیتنے کے بعد اپنے جذبات کا اظہار کرتے ہوئے کہا کہ انہوں نے کبھی خواب میں بھی نہیں سوچا تھا کہ ایک دن وہ آر سی بی کی قیادت کریں گے اور ٹیم کو چیمپئن بنائیں گے۔ گجرات ٹائٹنز کے خلاف فائنل میں 5 وکٹوں سے شاندار فتح کے بعد پاٹیدار نہایت جذباتی دکھائی دیے اور اس کامیابی کو اپنی زندگی کا یادگار لمحہ قرار دیا۔اتوار کو کھیلے گئے آئی پی ایل 2026 کے فائنل میں آر سی بی نے گجرات ٹائٹنز کو شکست دے کر مسلسل دوسری مرتبہ ٹائٹل اپنے نام کیا۔ خاص بات یہ رہی کہ دونوں مواقع پر ٹیم کی قیادت راجت پاٹیدار نے کی۔ فتح کے بعد پریزنٹیشن تقریب میں بات چیت کرتے ہوئے انہوں نے کہا کہ یہ احساس الفاظ میں بیان کرنا مشکل ہے۔پاٹیدار نے کہا، ’’یہ ایک شاندار احساس ہے۔ جب ہم یہاں آئے تو گزشتہ سال کی بہت سی یادیں تازہ ہو گئیں۔ میرے پاس اپنے جذبات بیان کرنے کے لیے الفاظ نہیں ہیں، لیکن میں خود کو بہت خوش قسمت محسوس کر رہا ہوں۔ ہماری حکمت عملی بالکل واضح تھی اور ٹاس جیتنے کے بعد ہدف کا تعاقب کرنا ہمارے لیے نسبتاً آسان ہو گیا تھا۔‘‘

انہوں نے ٹیم کے بولرز کی کارکردگی کو سراہتے ہوئے کہا کہ بھونیشور کمار، جوش ہیزل ووڈ، رسیخ سلام، کرنال پانڈیا، سویش شرما اور روماریو شیفرڈ نے پورے ٹورنامنٹ میں غیر معمولی بولنگ کی۔ ان کے مطابق یہی متوازن بولنگ یونٹ آر سی بی کی کامیابی کی بنیاد بنا۔آر سی بی کے کپتان نے مزید کہا، ’’میں نے کبھی خواب میں بھی نہیں سوچا تھا کہ میں آر سی بی کا کپتان بنوں گا اور ٹیم کو ٹرافی دلاؤں گا۔ شاید یہ میری قسمت میں لکھا تھا اور میں اس اعزاز کے لیے خدا کا بے حد شکر گزار ہوں۔‘‘رجت پاٹیدار نے ٹیم کے بڑھتے ہوئے اعتماد کا ذکر کرتے ہوئے کہا کہ گزشتہ سیزن کے مقابلے میں اس بار کھلاڑیوں کا اعتماد کہیں زیادہ مضبوط تھا۔ انہوں نے کہا کہ جہاں بھی آر سی بی کھیلنے گئی، وہاں موجود شائقین نے انہیں اپنے ہوم گراؤنڈ جیسا ماحول فراہم کیا، جس سے ٹیم کو اضافی حوصلہ ملا۔

اپنی ذاتی تیاری کے حوالے سے انہوں نے بتایا کہ ٹورنامنٹ سے قبل انہوں نے اپنی بیٹنگ کا تفصیلی تجزیہ کیا اور ان شاٹس پر توجہ مرکوز کی جو ان کے لیے سب سے زیادہ مؤثر ثابت ہو سکتے تھے۔ پاٹیدار نے سابق بھارتی وکٹ کیپر اور آر سی بی کے مینٹور دنیش کارتک کا خصوصی طور پر شکریہ ادا کرتے ہوئے کہا کہ ان کے مشورے اور رہنمائی نے انہیں کافی فائدہ پہنچایا۔آخر میں انہوں نے آر سی بی کے مداحوں کے نام پیغام دیتے ہوئے کہا، ’’یہ ٹرافی ایک بار پھر آپ سب کے لیے ہے۔ آر سی بی کے مداحوں نے ہر لمحے ہمارا ساتھ دیا اور اس سال کپ واقعی ہمارا ہے۔‘‘فائنل مقابلے میں گجرات ٹائٹنز نے پہلے بیٹنگ کرتے ہوئے 8 وکٹوں کے نقصان پر 155 رنز بنائے تھے۔ جواب میں آر سی بی نے وراٹ کوہلی کی ناقابل شکست 75 رنز کی شاندار اننگز کی بدولت 18 اوورز میں ہدف حاصل کرکے آئی پی ایل 2026 کا خطاب اپنے نام کر لیا۔

بھارت ایکسپریس اردو