FIFA World Cup 2026: فیفا عالمی کپ میں فرانس نے سینیگال کو 1-3 سے دی شکست، کیلین ایمباپے نے لیونل میسی کا ریکارڈ توڑا

نیو جرسی: فیفا ورلڈ کپ 2026 میں فرانس نے شاندار کھیل کا مظاہرہ کرتے ہوئے سینیگال کو 1-3 سے شکست دے دی۔ اس میچ میں فرانس کے اسٹار فارورڈ کیلین ایمباپے نے دو گول کیے اور ورلڈ کپ کی تاریخ میں سب سے زیادہ گول کرنے والوں کی فہرست میں لیونل میسی کو پیچھے چھوڑ دیا۔ ریئل میڈرڈ کے فارورڈ کیلین ایمباپے نے ایک بار پھر اپنی غیرمعمولی صلاحیتوں کا مظاہرہ کرتے ہوئے دو گول اسکور کیے۔ اس فتح کے ساتھ وہ فرانس کی قومی ٹیم کی تاریخ کے سب سے زیادہ گول کرنے والے کھلاڑی بھی بن گئے۔ فرانس کو 2018 کے عالمی چیمپئن اور 2022 کے فائنلسٹ ہونے کے باعث اس بار بھی ٹورنامنٹ جیتنے کے مضبوط دعویداروں میں شمار کیا جا رہا ہے اور ایمباپے کی فارم نے اس دعوے کو مزید تقویت دی ہے۔

فرانس کی بہترین کارکردگی

پہلے ہاف میں سینیگال نے فرانس کو سخت مقابلہ دیا اور دونوں ٹیمیں گول کرنے میں ناکام رہیں۔ تاہم دوسرے ہاف کے آغاز کے بعد کھیل کا رخ بدل گیا۔ 63ویں منٹ میں مائیکل اولیسے کی عمدہ پاس پر کیلین ایمباپے نے پرسکون انداز میں گیند کو جال میں پہنچا کر فرانس کو برتری دلائی۔ 79ویں منٹ میں متبادل کھلاڑی بریڈلی بارکولا نے ایڈوارڈ مینڈی کے اوپر سے گیند اچھالتے ہوئے فرانس کی برتری کو 0-2 کر دیا۔  سینیگال کی جانب سے ابراہیم مبائے نے ایک گول کر کے خسارہ کم کیا، لیکن اضافی وقت میں ایمباپے نے تقریباً 30 گز دور سے زبردست شاٹ لگا کر گیند سیدھی جال کے اوپری کونے میں پہنچا دی اور فرانس کی 1-3 سے فتح یقینی بنا دی۔

ورلڈ کپ میں نیا سنگ میل

اس میچ میں دو گول کرنے کے بعد کیلین ایمباپے کے ورلڈ کپ میں مجموعی گولوں کی تعداد 14 ہو گئی۔ اس کے ساتھ ہی وہ جرمنی کے عظیم اسٹرائیکر گیرڈ مولر کے برابر پہنچ گئے اور ورلڈ کپ کی تاریخ میں سب سے زیادہ گول کرنے والوں کی فہرست میں تیسرے نمبر پر آ گئے۔  اس فہرست میں جرمنی کے میروسلاو کلوزے 16 گول کے ساتھ پہلے جبکہ برازیل کے لیجنڈ رونالڈو 15 گول کے ساتھ دوسرے نمبر پر ہیں۔ میچ سے قبل ایمباپے کے ورلڈ کپ میں 12 گول تھے اور وہ برازیل کے عظیم فٹبالر پیلے کے برابر تھے، لیکن اس شاندار کارکردگی کے بعد وہ ان سے بھی آگے نکل گئے۔

فرانس کے کامیاب ترین گول اسکورر

اس میچ کے بعد بین الاقوامی فٹبال میں ایمباپے کے مجموعی گولوں کی تعداد 58 ہو گئی، جس کے ساتھ انہوں نے فرانس کے سابق اسٹرائیکر اولیویے جیروڈ (57 گول) کو پیچھے چھوڑ کر قومی ٹیم کی تاریخ کے سب سے کامیاب گول اسکورر کا اعزاز حاصل کر لیا۔ کیلین ایمباپے مسلسل تیسرے ورلڈ کپ میں گول کرنے میں کامیاب رہے ہیں اور رواں ٹورنامنٹ میں بھی وہ نمایاں کارکردگی دکھانے والے کھلاڑیوں میں شامل ہیں۔ ایمباپے نے قطر میں 2022 کے ورلڈ کپ فائنل میں ارجنٹینا کے خلاف 3-3 سے برابر رہنے والے مقابلے میں ہیٹ ٹرک بنا کر بھی تاریخ رقم کی تھی۔ وہ 1966 میں انگلینڈ کے جیوف ہرسٹ کے بعد ورلڈ کپ فائنل میں ہیٹ ٹرک کرنے والے دنیا کے صرف دوسرے فٹبالر ہیں۔

بھارت ایکسپریس اردو۔