FIFA WorldCup: کیپ وردے کے گول کیپر نے سوشل میڈیا پر مچایا ہنگامہ، اسپین کے خلاف ورلڈ کپ ڈرا کے بعد انسٹاگرام پر ایک کروڑ سے زائد فالوورز، شاندار کارکردگی کے لیے ملا’پلیئر آف دی میچ‘ ایوارڈ

اٹلانٹا: فیفا ورلڈ کپ 2026 میں اسپین کے خلاف شاندار کارکردگی کے بعد کیپ ورڈے کے تجربہ کار گول کیپر ووزینا سوشل میڈیا پر اچانک عالمی شہرت حاصل کرنے میں کامیاب ہوگئے ہیں۔ اسپین کے خلاف 0-0 سے ڈرا ہونے والے میچ میں ان کی غیرمعمولی گول کیپنگ کے بعد ان کے انسٹاگرام فالوورز کی تعداد تقریباً 50 ہزار سے بڑھ کر ایک کروڑ سے تجاوز کر گئی۔

24 گھنٹوں میں لاکھوں نئے فالوورز

ووزینا نے میچ کے بعد صرف 24 گھنٹوں سے بھی کم وقت میں تقریباً 55 لاکھ نئے انسٹاگرام فالوورز حاصل کیے۔ خبر لکھے جانے تک ان کے انسٹاگرام پر فالوورز کی تعداد 1 کروڑ 1 لاکھ 60 ہزار (11.6 ملین) تک پہنچ چکی تھی اور یہ تعداد مسلسل بڑھتی ہی جارہی ہے، جس کے بعد وہ ٹورنامنٹ کی سب سے بڑی سوشل میڈیا شخصیات میں شامل ہوگئے ہیں۔

اسپین کے خلاف یادگار دفاعی کارکردگی

فیفا ورلڈ کپ میں پہلی مرتبہ شرکت کرنے والی کیپ وردے کی ٹیم نے عالمی نمبر دو اور موجودہ یورپی چیمپئن اسپین کے خلاف شاندار دفاعی کھیل پیش کرتے ہوئے مقابلہ بغیر کسی گول کے برابر رکھا۔ آبادی کے لحاظ سے ورلڈ کپ میں شرکت کرنے والے سب سے چھوٹے ممالک میں شامل کیپ وردے نے اسپین جیسے مضبوط حریف کو گول کرنے سے روک کر سب کو حیران کر دیا۔ اس میچ میں اسپین نے مجموعی طور پر 27 شاٹس لیے، لیکن ایک بھی گول نہ کر سکا۔ یہ فیفا ورلڈ کپ کی تاریخ میں اسپین کی جانب سے کسی گول کے بغیر لیے گئے مشترکہ طور پر سب سے زیادہ شاٹس ہیں۔ اس سے قبل 1998 کے ورلڈ کپ میں پیراگوئے کے خلاف بھی اسپین نے 27 شاٹس لیے تھے اور وہ مقابلہ بھی 0-0 سے ختم ہوا تھا۔

ووزینا بنے میچ کے ہیرو

40 سالہ ووزینا نے اس مقابلے میں مجموعی طور پر سات شاندار سیوز کیے، جن میں پہلے ہاف کے دوران صرف چھ منٹ کے اندر تین اہم بچاؤ بھی شامل تھے۔ انہوں نے میکل اویارزابال کے ہیڈر کو شاندار انداز میں روکا، فیران ٹوریس کی قریبی کوشش کو قابو کیا، ایمیرک لاپورٹ کے ہیڈر کو گول بننے سے بچایا، جبکہ میکل میرینو اور مارک کوکوریلا کی کوششیں بھی ناکام بنائیں۔ ان کی غیرمعمولی کارکردگی پر انہیں ’پلیئر آف دی میچ‘ کا اعزاز دیا گیا۔

کیپ وردے کی تاریخ ساز شروعات

ووزینا 40 سال اور 12 دن کی عمر میں ورلڈ کپ میں کیپ وردے کی پہلی شرکت کے دوران میدان میں اترنے والے معمر ترین کھلاڑی بھی بن گئے۔ میچ کے آخری لمحات میں پیکو لوپیز نے بھی 88ویں منٹ میں اہم بلاک کرکے اویارزابال کو یقینی گول سے محروم کر دیا، جبکہ کیپ وردے کے ڈینی بورجیس کی ایک خطرناک کوشش کو اسپین کے گول کیپر اونائی سیمون نے روک لیا۔

اسپین کی مشکلات برقرار

اسپین کے لیے فیران ٹوریس کی ایک کوشش پہلے ہاف میں گول پوسٹ سے ٹکرا گئی، جبکہ نوجوان اسٹار لامین یامال کی آمد بھی ٹیم کو فتح نہ دلا سکی۔ اسپین نے پہلے ہاف میں 12 شاٹس لیے، مگر کوئی بھی گول میں تبدیل نہ ہو سکا۔ اس نتیجے کے بعد اسپین مسلسل چوتھے ورلڈ کپ میچ میں فتح حاصل کرنے میں ناکام رہا، جو اس کی ورلڈ کپ تاریخ کی مشترکہ طویل ترین ناکام سیریز ہے۔ 2010 کی عالمی چیمپئن اسپین کو اگرچہ ایک پوائنٹ حاصل ہوا، تاہم اب اسے 21 جون کو سعودی عرب کے خلاف اگلے میچ میں بہتر کارکردگی دکھانا ہوگی۔

بھارت ایکسپریس اردو۔